ƏCNƏBİ QAÇQINLARA VƏSİQƏLƏR TƏQDİM OLUNMUŞDUR
AZƏRTAC-ın müxbiri xəbər verir ki, mərasimdə Qaçqın Statusunun Müəyyənləşdirilməsi Departamentinin direktoru Səfər İmanov, Qaçqınkom aparatının rəhbəri Telman Məmmədov, BMT-nin Qaçqınlar üzrə Ali Komissarlığının Azərbaycan nümayəndəliyinin hüquq şöbəsinin müdiri Mahua Parums çıxış etmişlər. Qeyd olunmuşdur ki, Azərbaycan dövləti və hökuməti ölkəmizdə 1 milyondan artıq qaçqın və köçkünün olmasına baxmayaraq, xaricdən gələn qaçqınlara sığınacaq verilməsi və onların statusunun müəyyən edilməsinə, müstəqil olaraq Azərbaycanda vətəndaşlığı olmayan şəxslərin vəsatətlərinin qəbul edilməsinə diqqətlə yanaşır. Keçən ilin may ayından etibarən BMT-nin Qaçqınlar üzrə Ali Komissarlığının (QAK) Azərbaycandakı nümayəndəliyi vasitəsilə departamentə 49 vəsatət, 2004-cü ilin yanvar ayından bəri isə 89 vəsatət daxil olmuş və bütövlükdə indiyədək 138 vəsatətə baxılmışdır. Bu gün isə 4 vəsatət təmin edilmiş və 6 nəfər əcnəbi vətəndaşa qaçqın statusunu təsdiq edən sənəd verilmişdir.
Qaçqınkom aparatının rəhbəri T.Məmmədov əcnəbi qaçqınlara vəsiqələri təqdim etmiş və ilk status alanları təbrik etmişdir. Pakistan və İrandan olan 6 nəfər vətəndaş qaçqın vəsiqəsi almışdır.
