MƏDƏNİYYƏT
ƏDƏBİ-BƏDİİ GECƏ
Dövlət Musiqili Komediya Teatrında tanınmış telejurnalist, şairə Telli Pənahqızının yaradıcılıq gecəsi keçirilmişdir.
T.Pənahqızı təkcə öz publisistik yazıları, telesüjetləri ilə deyil, həm də şerləri ilə nəzər diqqəti cəlb edir. Xüsusilə son illərdə onun bir-birinin ardınca işıq üzü görən “Ömrün qoşa izi”, “Tanrımla söhbət”, “Ayrılıqdan sonra çəkilmiş şəkillər” və “Səsində ay işığı var” adlı kitabları oxucular tərəfindən böyük maraqla qarşılanmışdır.
Tanınmış ziyalıların, mədəniyyət və incəsənət xadimlərinin dəvət olunduğu gecədə öncə Telli xanımla bağlı telesüjet nümayiş etdirildi.
Sonra filologiya elmləri doktoru, professor İsmayıl Vəliyev, xalq yazıçısı, professor Əzizə Cəfərzadə, əməkdar jurnalist Mailə Muradxanlı, filologiya elmləri doktoru, professor Qəzənfər Paşayev, şair Vahid Əziz və başqaları çıxış edərək Telli Pənahqızının yaradıcılığından və şəxsiyyətindən, vətənpərvərliyindən ətraflı söz açdılar. Ona sonsuz sevgi və ehtiramlarını ifadə etdilər.
Eyni zamanda, gecədə incəsənət ustalarının ifasında T.Pənahqızının sözlərinə yazılmış mahnılar səsləndirildi.