ƏDƏBİYYATŞÜNAS ALİM VƏ YAZIÇININ YUBİLEYİ QEYD OLUNMUŞDUR
Azərbaycan Milli Elmlər Akademiyasının Nizami adına Ədəbiyyat Muzeyində tanınmış ədəbiyyatşünas alim, filologiya elmləri doktoru, tarixi romanlar müəllifi Əzizə Cəfərzadənin 80 illik yubileyinə həsr olunmuş yığıncaq keçirilmişdir.
Yığıncaq iştirakçıları əvvəlcə muzeyin əməkdaşı, filologiya elmləri namizədi Gülzar İbrahimqızının yazıçı, publisist, ictimai xadim, professor Əzizə xanım Cəfərzadənin həyat və yaradıcılığına həsr etdiyi səyyar sərgiyə baxdılar.
Yığıncaqda Azərbaycan ədəbiyyatının və mədəniyyətinin inkişafında Əzizə Cəfərzadənin xidmətlərindən ətraflı bəhs olundu.
Filologiya elmləri doktoru Alxan Bayramoğlu “Əzizə Cəfərzadənin həyat və yaradıcılığı” mövzusundakı məruzəsində onun daha çox yazıçılıq fəaliyyətindən söz açdı. S.Ə.Şirvaniyə həsr olunmuş” Aləmdə səsim var mənim”, Nişat Şirvanidən bəhs edən “Vətənə qayıt”, M.Ə.Sabirlə A.Səhhətin dostluğundan danışan “Yad et məni” romanlarından ibarət trilogiyası üzərində ətraflı dayanan A.Bayramoğlu həmin əsərləri Azərbaycan ədəbiyyatında özünəməxsus yeri olan bədii nümunələr kimi qiymətləndirdi.
Akademik Bəkir Nəbiyev, Azərbaycan Yazıçılar Birliyinin sədri, Milli Məclisin Mədəniyyət Məsələləri vzrə Daimi Komissiyasının sədri Anar, AMEA-nın müxbir üzvü Tofiq Hacıyev, Edinburq Universitetinin professoru Qulamrza Səbri Təbrizi, filologiya elmləri doktoru Vaqif Sultanlı və başqaları yubilyarı təbrik etdilər, ona möhkəm can sağlığı, yaradıcılıq uğurları arzuladılar.
Əzizə Cəfərzadə ona göstərilən diqqət və qayğıya görə minnətdarlıgını bildirdi.
Bölmənin digər xəbərləri
