ƏFQANISTAN XİN VİTSE-PREZİDENT H.Ə. QƏDİRİN QƏTLİNİ KƏSKİN SURƏTDƏ PİSLƏMİŞDİR
Əfqanıstan XİN-in rəsmi nümayəndəsi ölkənin vitse-prezidenti və keçid hökumətinin ictimai işlər naziri Hacı Əbdül Qədirin qətlini kəskin surətdə pisləmişdir.
XİN nümayəndəsi bu hadisəni terror hücumu, Əfqanıstanda sülhü və ölkənin bərpasını pozmaq məqsədi ilə törədilmiş “qorxaq hərəkət” adlandırmışdır. O bəyan etmişdir ki, H.Ə. Qədirin ölümü ölkə üçün böyük itkidir.
Əfqanıstanın üç vitse-prezidentindən biri olan H.Ə.Qədir Kabilin mərkəzində hücuma məruz qalmış və hadisə yerində həlak olmuşdur. Polis bu terrorçuluq aktının “Taliban” hərəkatına sədaqətli şəxslər tərəfindən törədildiyini güman edir.
Sinxua agentliyinin yaydığı məlumata görə, Əfqanıstan Prezidenti Həmid Kərzayi Nazirlər Kabinetinin təcili iclasını çağıraraq bəyan etmişdir ki, ətraflı araşdırmalar aparılacaqdır. Xarici İşlər Nazirliyi baş vermiş hadisənin təşkilatçısını Əfqanıstanda sülhün əleyhinə çıxış edən “dövlət düşməni” adlandırmışdır. Daxili İşlər Nazirliyinin əmri ilə Kabildə qatillərin intensiv axtarışı aparılır.
Bölmənin digər xəbərləri
