Əfran İsmayılov: Ölkə futbolunun əfsanələri arasında keçirilən matçda yoldaşlıq qalib gəldi
Bakı, 20 may, AZƏRTAC
Bakıda təşkil olunacaq minifutbol üzrə dünya çempionatına həsr olunan “Legend Cup”da yoldaşlıq və qardaşlıq qalib gəldi.
Bu sözləri AZƏRTAC-a açıqlamasında Bakıda ölkə futbolunun əfsanələri arasında keçirilən matçda “Premyerliqa məşqçiləri” komandasının heyətində çıxış edən veteran yarımmüdafiəçi Əfran İsmayılov deyib.
Hazırda “Araz-Naxçıvan” klubunda köməkçi məşqçi kimi fəaliyyət göstərən keçmiş futbolçu “Neftçi 2000-lər” komandası ilə gərgin, eyni zamanda maraqlı görüş keçirdiklərini bildirib: “3:2 hesabı ilə qalib gəldik. Qollardan birinin müəllifi özüm oldum. Açığı, oynaya biləcəyimi düşünmürdüm. Çünki dizimdə çarpaz bağlar qopduğu üçün ehtiyat edirdim. Əslində, əməliyyat olunmalı, futbol oynamamalıyam. Son dəfə 2 il bundan öncə minifutbol oynamışam və orada zədələndikdən sonra futbolla vidalaşmışam. Çox sağ olsunlar ki, həkimlərimiz dizimi bağladılar və mən də “Premyerliqa məşqçiləri” komandasının bir üzvü kimi çıxış etdim. Qarşılaşma veteranlar arasında təşkil olduğu üçün rahat şəkildə oynamaq olurdu”.
O, qarşılaşmanın keçirildiyi Milli Gimnastika Arenasında gözəl atmosferin olduğunu söyləyib: “Belə matçların tez-tez təşkil olunmasını istərdik. Həm bizə, həm də azarkeşlərə çox maraqlı olur. Yaxşı təşkilatçılığa görə Azərbaycan Minifutbol Federasiyasında təşəkkür edirəm. Bizim komandamızda demək olar ki, hamı Qurban Qurbanovun tələbəsi idi. Bu, çox xoş haldır. Rəqib kollektiv kifayət qədər güclü idi. Daha istəkli və çevik idilər. Çünki Rail Məlikov, Rəşad Sadiqov, Ruslan Abışov, Rəşad Abdullayev kimi gənc futbolçuları çox idi. Sevindirici haldır ki, rəqibin heyətindəki sürətli futbolçulara baxmayaraq, kubokun sahibi biz olduq”.
Qeyd edək ki, görüşün əsas vaxtı 1:1 hesabı ilə yekunlaşıb. Penaltilər seriyasında isə “Premyerliqa məşqçiləri” 3:2 hesabı ilə sevinən tərəf olub.
Bölmənin digər xəbərləri
