Ekologiya idarəsinin əməkdaşları “Greenevo” – yaşıl texnologiyaların akseleratoru” mövzusunda iqtisadi seminarda iştirak etmişlər
Bakı, 25 sentyabr (AZƏRTAC). Sentyabrın 25-də Azərbaycan Respublikası Dövlət Neft Şirkətinin (ARDNŞ) ekologiya idarəsinin əməkdaşları Polşa Respublikasının Azərbaycandakı səfirliyi tərəfindən təşkil olunmuş “Greenevo” - yaşıl texnologiyaların akseleratoru” mövzusunda iqtisadi seminarda iştirak etmişlər.
AZƏRTAC xəbər verir ki, seminarın əsas məqsədi Azərbaycan Respublikasında ekoloji problemlərin həlli istiqamətində birgə fəaliyyət və ətraf mühitin mühafizəsi sahəsində innovativ “yaşıl texnologiyalar”ın ixracının təklif edilməsi olmuşdur.
Çıxışlarda son illər dünya miqyasında ekoloji məsələlərə diqqətin artırılması, bu istiqamətdə görülmüş işlər, ekoloji dayanıqlı texnologiyalar və onların tətbiqi barədə ətraflı məlumat verilmişdir.
Seminarda “Greenevo” proqramı çərçivəsində Polşa şirkətlərinin nümayəndələri qısa təqdimatla təmsil etdikləri qurumlar və ekoloji texnologiyaları barədə iştirakçıları məlumatlandırmışlar.
Sonda Polşa şirkətlərinin təmsilçilərinin Azərbaycan iş adamları və dövlət strukturlarının nümayəndələri ilə görüşləri keçirilmişdir. Tədbirlərdə təklif olunan texnologiyalar və onların tətbiqi imkanları barədə ətraflı müzakirələr aparılmışdır.
Bölmənin digər xəbərləri
