Ekologiya və Təbii Sərvətlər Nazirliyi hava haqqında operativ məlumat yaymışdır
Bakı, 24 sentyabr (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti hava haqqında operativ məlumat yaymışdır.
Məlumata görə, sentyabr ayının 23-dən 24-nə keçən gecə soyuq atmosfer cəbhəsinin keçməsi nəticəsində Bakı şəhərində güclü yağış yağmış, şimşək çaxmışdır. Dörd saat ərzində düşən yağışın miqdarı 30-33 millimetr təşkil etmişdir ki, bu da aylıq normanın 174-192 faizidir.
Nazirliyin mətbuat xidmətindən AZƏRTAC-a bildirmişlər ki, çoxillik meteoroloji məlumatlara əsasən Bakı şəhərində sentyabr ayı üçün yağıntının sutkalıq rekord göstəricisi 1980-ci ildə qeydə alınmış və 12 saat ərzində düşən yağışın miqdarı 46 millimetr olmuşdur.
Ümumilikdə sentyabrın 22-si axşamdan başlayaraq 24-ü səhərədək ölkə ərazisində ən çox düşən yağıntının miqdarı Cəfərxanda 82 millimetr olmaqla aylıq normanın 443 faizini, Qazıməmməddə 72 millimetr olmaqla aylıq normanın 500 faizini, Bakıda 44 millimetr olmaqla aylıq normanın 256 faizini, Maştağada 44 millimetr olmaqla aylıq normanın 196 faizini, İmişli və Beyləqanda 35 millimetr olmaqla aylıq normanın 177 faizini, Tərtərdə 35 millimetr olmaqla aylıq normanın 140 faizini təşkil etmişdir.
Bölmənin digər xəbərləri
