Ekologiya və Təbii Sərvətlər Nazirliyində mart ayı ərzində 81 şikayətə baxılıb
Bakı, 21 aprel, AZƏRTAC
Ekologiya və Təbii Sərvətlər Nazirliyinin 168 nömrəli “Qaynar xətt” xidmətinə mart ayı ərzində ətraf mühitin mühafizəsi ilə bağlı 81 şikayət daxil olub.
Nazirliyin mətbuat xidmətindən AZƏRTAC-a bildirilib ki, yaşıllıqların mühafizəsi ilə bağlı olan 43 müraciət yerində araşdırılıb və qanunamüvafiq tədbirlər görülüb. Belə ki, araşdırma zamanı ağacların qanunsuz kəsilməsi ilə bağlı 5 şikayət üzrə qanun pozucularına qarşı protokol tərtib edilib və onlara 12 min 688 manat məbləğində cərimə tətbiq olunub. Qanunsuz olaraq 5 ağacın kəsilməsi faktı ilə bağlı təqsirkarların müəyyənləşdirilməsi və qanunvericiliyə uyğun qaydada məsuliyyətə cəlb edilməsi məqsədilə aidiyyəti rayon polis şöbələrinə məktub göndərilib. Qanunsuz ağac kəsilməsi ilə bağlı daxil olmuş digər müraciətlər araşdırılarkən 13 şikayət üzrə ekspertiza rəyi əsasında budanma işlərinin aparıldığı, 5 şikayət üzrə isə ağacların yararsız olduğuna görə ekoloji ekspertizanın rəyi əsasında kəsildiyi müəyyən olunub. Daxil olan 15 müraciət öz təsdiqini tapmayıb.
Tullantılarla bağlı daxil olmuş 31 müraciət araşdırılıb və 1 şikayət üzrə təqsirkar barəsində protokol tərtib edilərək qanun pozucusu inzibati qaydada 800 manat məbləğində cərimə olunub, 9 fakt üzrə isə icrası məcburi olan müddətli ”məcburi göstəriş” verilib. Digər 21 müraciət öz təsdiqini tapmayıb.
Yerin təkindən qanunsuz istifadə ilə bağlı daxil olmuş 5 müraciət yerində araşdırılıb, 1 şikayət üzrə protokol tərtib edilərək qanun pozucusu 400 manat məbləğində cərimə olunub, 4 müraciət isə təsdiqini tapmayıb.
Ov üçün icazə biletinin alınması ilə bağlı daxil olmuş 2 müraciətə baxılıb və təmin edilib.
Bölmənin digər xəbərləri
