Ekspertlər: Neft qiymətlərinin azalması müvəqqəti xarakter daşıyır
Bakı, 5 oktyabr, AZƏRTAC
“Böyük Yeddilik” ölkələrinin strateji ehtiyatlardan istifadə edərək 100 milyon barel neft və dizel yanacağını bazara çıxarmaq barədə qərarı dünya bazarında neftin qiymətinin düşməsinə səbəb olub.
AZƏRTAC xəbər verir ki, “Brent” markalı neftin xam neftin bir barelinin qiymətinin 102 dollara enməsi inflyasiyanın azalmasına və istehlak mallarının qiymətlərinin artımının nisbətən qarşısının alınmasına imkan verib. Avropa dövlətlərinin məqsədi də məhz bundan ibarət olub. Onlar neftin qiymətinin artmasının ardınca istehlak mallarının bahalaşmasından ehtiyat edərək bu addımı atıblar.
Lakin strateji ehtiyatlardan istifadə 4 ay müddətində nəzərdə tutulub. Analitiklər isə sual edirlər: Bəs dörd aydan sonra nə olacaq? Bu müddət ərzində Yaxın Şərqdəki hərbi-siyasi vəziyyət sabitləşəcək və Hörmüz boğazı açılacaqmı?
Bu sualları cavablandırmaq olduqca çətindir və dəqiq proqnoz vermək mümkün deyil. Məsələnin mahiyyəti ondan ibarətdir ki, ABŞ Yaxın Şərqdə məqsədlərinə çata bilməyib və bu istiqamətdə siyasətini davam etdirir. İran da öz növbəsində geriyə addım atmaq niyyətində deyil. Əksinə, ABŞ-nin bəzi analitik mərkəzləri hesab edir ki, noyabrda Birləşmiş Ştatlarda keçiriləcək aralıq seçkilərindən sonra hərbi əməliyyatlar bərpa oluna bilər.
İndiki məqamda hərbi əməliyyatların davam etdirilməsi dünya bazarında neft təchizatını daha da məhdudlaşdıra bilər ki, bu da ölkədə qiymət artımının yeni dalğasına səbəb olacaq. Belə olan təqdirdə isə Prezident Donald Trampın partiyası qələbə qazana bilməz.
Qərb mətbuatı bu təklifin ABŞ-dən gəldiyini bildirir. Avropa İttifaqının dizelə olan tələbatının 50 faizi ABŞ-dən idxal olunurdu. Lakin ABŞ-nin Avropaya dizel yanacağı ixrac etmək imkanları artıq tükənib. Daxili tələbat artıb və təchizatın azalması qiymətlərin gündən-günə yüksəlməsinə səbəb olur.
Ekspertlərin fikrincə, hazırda dünya bazarında neftin qiymətinin azalması müvəqqəti xarakter daşıyır. Çünki 4 aydan sonra nə baş verəcəyi heç kimə məlum deyil. Əsas məsələ Yaxın Şərq problemini həll etmək və Hörmüz boğazını açmaqdır ki, dünya bazarının neftlə təchizatı bərpa edilsin.
Bölmənin digər xəbərləri
