ƏLİYAR ƏLİYEVİN XATİRƏSİNƏ HƏSR OLUNMUŞ TURNİRİN İLK GÜNÜ YUNAN-ROMA GÜLƏŞÇİLƏRİ QÜVVƏLƏRİNİ SINAMIŞLAR
Bakı, 10 oktyabr (AZƏRTAC). Milli Qəhrəman, əməkdar məşqçi Əliyar Əliyevin xatirəsinə həsr olunmuş sərbəst və yunan-Roma güləşi üzrə gənclər arasında respublika turniri start götürmüşdür.
FİLA-nın mövcud qaydalarına əsasən 50, 55, 60, 66, 74, 84, 96 və 120 kiloqrama qədər çəki dərəcələri üzrə (hər çəki dərəcəsindən 1 idmançı) keçirilən yarışlarda Azərbaycan Güləş Federasiyasının nümayəndəlikləri və ayrı-ayrı idman cəmiyyətlərindən 1990-1992-ci il təvəllüdlü idmançılar iştirak edirlər.
Turnirin ilk günündə yunan-Roma güləşi üzrə güləşçilər öz qüvvələrini sınamışlar. 20 komandadan 94 idmançının mübarizəsinin yekununda ən yaxşı nəticələri Eldəniz Əzizli (50 kq), Muğan Əliyev (55 kq), Vüsal Atayev (60 kq), Kamran Məmmədov (66 kq), Niyaməddin İbrahimov (74 kq), Şəhriyar Məmmədov (84 kq), Murtuza Tağıyev (96 kq) və Hüseyn Quliyev (120 kq) göstərmişlər.
Sayca 11-ci olan bu turnirə cari ildən etibarən sərbəst güləşçilər də qoşulur. Sərbəst güləşçilər oktyabrın 11-də öz qüvvələrini sınayacaqlar.
######
Bölmənin digər xəbərləri
