E.Qasımzadə: Beynəlxalq Memarlar İttifaqının tədbirinin Bakıda keçirilməsi Azərbaycanın böyük nüfuza malik olmasının göstəricisidir
Bakı, 29 mart, Ramiz Quliyev, AZƏRTAC
Beynəlxalq Memarlar İttifaqı Bürosunun iclasının Bakı şəhərində keçirilməsi Azərbaycanın dünya miqyasında böyük nüfuza malik olduğunun, ölkəmizdə memarlıq sənətinə olan dövlət qayğısı və bu sahədə son illər əldə edilən nailiyyətlərlə bağlıdır.
AZƏRTAC xəbər verir ki, bu fikirləri martın 29-da Azərbaycan Memarlar İttifaqının İdarə Heyətinin sədri Elbay Qasımzadə Bakıda Beynəlxalq Memarlar İttifaqı Bürosunun iclasından öncə keçirdiyi mətbuat konfransında deyib.
O bildirib ki, Azərbaycan Memarlar İttifaqı Beynəlxalq Memarlar İttifaqının 1992-ci ildən üzvüdür və Azərbaycan bu mötəbər quruma müstəqil dövlət kimi daxil olub.
Bu illər ərzində memarlarımızın əldə etdiyi nailiyyətlərdən danışan E.Qasımzadə vurğulayıb ki, Beynəlxalq Memarlar İttifaqına üzv olmaqla Azərbaycan memarları dünyada memarlıq sənətində gedən proseslər haqqında daha dolğun və geniş məlumat ala bilib. “Bundan başqa, Azərbaycan Memarlar İttifaqı ölkəmizin qədim mədəniyyəti haqqında öz xarici tərəfdaşlarımıza kifayət qədər geniş məlumat verib. Bu gün Azərbaycana olan maraq ondan irəli gəlir ki, bizim xaricdəki həmkarlarımız respublikamızın mədəniyyəti haqqında kifayət qədər məlumat alıblar”.
E.Qasımzadə bildirib ki, bu toplantının keçirilməsində əsas məqsədlərdən biri də memarlıq sənəti qarşısında duran mühüm problemlərin birgə həllinə nail olmaqdır.
Bölmənin digər xəbərləri
