ERMƏNİSTAN DANIŞIQLAR PROSESİNƏ MANEÇİLİK TÖRƏDİR

09.04.2006 [01:45]
Çap et
A⁺ A^-

AZƏRTAC-ın xüsusi müxbiri xəbər verir ki, aprelin 8-də Strasburqda Avropa Şurasının iqamətgahında qurumun liberal qrupunun, Avropa Parlamenti Liberal Partiyasının, Avropa Demokratik İslahatlar və Liberal Partiyasının, Beynəlxalq Liberal qrupunun təşəbbüsü ilə Kosovonun gələcək statusu məsələsinə həsr olunmuş konfrans keçirilmişdir.

Tədbirdə ölkəmizi Demokratik İslahatlar Partiyasının sədri, Milli Məclisin deputatı Asim Mollazadə təmsil etmişdir.

Konfransda Avropa Şurası və Avropa İttifaqı deputatlarından ibarət nümayəndələr, Serbiya-Çernoqoriya təmsilçiləri iştirak etmiş və müzakirə olunan məsələ ətrafında geniş fikir mübadiləsi aparmışlar.

Müzakirələrə qatılmış Asim Mollazadə belə münaqişələrin, o cumlədən, Ermənistan-Azərbaycan, Dağlıq Qarabağ münaqişəsinin beynəlxalq hüquq normaları çərçivəsində həllinin zəruriliyini vurğulamışdır.

A.Mollazadə konfrans iştirakçılarının əsas diqqətini Ermənistanın ölkəmizə qarşı təcavüzkar siyasət apardığına, torpaqlarımızın 20 faizini işğal etdiyinə yönəltmiş, işğal olunmuş ərazilərin azad olunması üçün hər iki dövlət arasında danışıqlar prosesinin getdiyini bildirmiş, amma Ermənistanın münaqişənin sülh yolu ilə həlli istiqamətindəki danışıqlar prosesinə ciddi maneçilik törətdiyini xüsusi qeyd etmişdir.

Azərbaycanlı deputatın çıxışı maraqla qarşılanmışdır.

Konfrans müzakirə olunmuş məsələ ətrafında xüsusi qətnamə qəbul etmişdir.