ERMƏNİSTANDA BƏZİ İNSANLAR HƏLƏ DƏ SÜLHƏ HAZIR DEYİLLƏR
Azərbaycan Respublikasının xarici işlər naziri Elmar Məmmədyarov AZƏRTAC-ın müxbirinə demişdir ki, Ermənistan -Azərbaycan, Dağlıq Qarabağ münaqişəsinin sülh yolu ilə həlli istiqamətində danışıqlar davam etdiriləcəkdir. Bu günlərdə Belçikanın paytaxtı Brüsseldə ATƏT-in Minsk qrupunun həmsədrləri və Ermənistanın xarici işlər naziri ilə görüş olmuşdur. Danışıqlar Praqa prinsipləri əsasında aparılmışdır. Azərbaycan bir daha öz ədalətli mövqeyini bildirmişdir. Ermənistanda isə bəzi insanlar hələ də sülhə hazır deyillər. Onlar problemin xalqa necə ağır təsir göstərdiyini düşünmürlər və yalnız Qərbin dəstəyi ilə hakimiyyətdə qalmaq istəyirlər. Bu gün Avropa Şurası Parlament Assambleyasının Alt Komitəsi də münaqişə ilə bağlı qətnamə hazırlamışdır. Biz bu sənədin obyektiv olacağına inanırıq. Deməliyəm ki, ilk növbədə işğal olunmuş ərazilərimizdən köçürülmüş məcburi köçkünlər öz yaşayış yerlərinə qayıtmalıdırlar. Məhz bu baxımdan biz daha çox səmimiliyə və irəliləyişə nail ola bilərik. Bununla biz həm də sabitlik baxımından bölgədə sülhün və təhlükəsizliyin təmin edilməsinə nail ola bilərik.
Bölmənin digər xəbərləri
