ƏSGƏRİNİ 13 İL BUNDAN ƏVVƏL GÜLLƏLƏMİŞ KOMANDİR HAQQINDA HƏBS QƏTİMKAN TƏDBİRİ SEÇİLMİŞDİR
Həmin faktla bağlı 1992-ci il sentyabrın 4-də Azərbaycan Respublikası Baş Prokurorluğu tərəfindən Cinayət Məcəlləsinin 95-ci maddəsi ilə cinayət işi başlanılmış və istintaqın davam etdirilməsi üçün aidiyyəti üzrə Qarabağ Hərbi Prokurorluğuna göndərilmişdir.
Qarabağ Hərbi Prokurorluğunda iş üzrə müəyyən istintaq hərəkətləri yerinə yetirilsə də cinayət törətmiş şəxs müəyyən edilmədiyindən işin icraatı 1995-ci il mayın 10-da dayandırılmışdır.
Həmin iş üzrə dayandırılmış icraat Respublika hərbi prokuroru tərəfindən 2005-ci il sentyabrın 22-də təzələnmiş və istintaqın davam etdirilməsi prokurorluğun Ağır cinayətlərə dair işlər üzrə İstintaq İdarəsinə tapşırılmışdır.
Aparılmış istintaq nəticəsində müəyyən edilmişdir ki, İsmayılov Çingiz Burzü oğlu 1992-ci il avqustun 20-də Xocavənd rayonunun Əmralılar kəndi ərazisində yerləşən “N” hərbi hissəsində bölük komandirinin müavini vəzifəsində xidmət edərkən digər bölüyün komandir müavini Əliyev Eynulla Fərhad oğlu, əsgərlər - Hüseynov Azər Qurban oğlu və Quliyev Adil Kamran oğlu, habelə bölükdə qeyri-qanuni saxlanılan iki qadınla birlikdə gecə saat 23.30 radələrində sərxoş vəziyyətdə ətraf postları yoxlamağa getmişdir. Ç. İsmayılov postları yoxlayıb qayıdarkən qərargahın yaxınlığında onlara tərəf atəş açılmasını və sonra da guya yolun sağ tərəfində olan həyətdən şaqqıltı səsini eşitməsini bildirərək, həmin vaxt 2-3 metr həyətə tərəf gedib xidməti avtomat silahından ardıcıl atəş açmış sonra yerində fırlanaraq arxa tərəfində dayanmış A.Quliyev, A.Hüseynov və onlarla birlikdə olan qadınlara qəsdən atəşlər açmışdır. Ç.İsmayılovun açdığı atəşlər nəticəsində ondan 2-3 metr məsafədə olan A.Quliyev qarın nahiyəsindən və A.Hüseynov sağ ayağının pəncəsinin alt hissəsindən yaralanmışlar. Sonra Ç.İsmayılov yanında olan şəxsləri aldadaraq atəşin guya düşmən tərəfindən açılmasını bəhanə gətirib, xidməti avtomat silahını həmin qadınlardan birinə vermiş, özü isə, A.Quliyevə xidməti istifadə üçün verilmiş pulemyotu götürüb geri qayıtmış və törətdiyi ağır cinayəti gizlətmək məqsədi ilə hadisənin şahidləri olmuş şəxsləri öldürmək məqsədi ilə onların olduğu yerə atəşlər açmışdır. Lakin göstərilən şəxslər özlərini qorumaq məqsədi ilə yerə uzandıqlarından Ç.İsmayılov iradəsindən asılı olmayan səbəblərdən məqsədinə nail ola bilməmişdir. Nəticədə A.Quliyev qarın nahiyəsindən aldığı xəsarətdən ölmüş və A.Hüseynov səhhətin qısa müddətə pozulmasına səbəb olan yüngül zərər almışdır.
Törətdiyi cinayətə görə Çingiz İsmayılov Azərbaycan Respublikasının 2000-ci il sentyabrın 1-dək qüvvədə olmuş CM-nin 94-cü maddəsinin 2-ci və 6-cı bəndləri (xuliqanlıq niyyəti ilə və bir çox şəxsin həyatı üçün təhlükəli olan üsulla qəsdən adamöldürmə) və 15.94-cü maddəsinin 4-cü, 6-cı və 7-ci bəndləri (iki və ya bir neçə şəxsi, bir çox şəxsin həyatı üçün təhlükəli olan üsulla və başqa cinayəti gizlətmə məqsədi ilə qəsdən adam öldürməyə cəhd) ilə təqsirləndirilən şəxs qismində cəlb edilmiş və barəsində Bakı Hərbi Məhkəməsinin qərarı ilə həbs qətimkan tədbiri seçilmişdir.
Hazırda cinayət işi üzrə istintaq davam edir.
Bölmənin digər xəbərləri
