ESTONİYA HÜQUQ-MÜHAFİZƏ ORQANLARININ VƏ KİV-NİN ƏMƏKDAŞLARI BAKIYA GƏLƏCƏKLƏR
Azərbaycan Gənc Hüquqşünaslar Birliyinin dəvəti ilə Estoniyadan geniş tərkibli nümayəndə heyəti sentyabrın 8-də Bakıya gələcəkdir. Nümayəndə heyətinə Estoniya Prokurorluğunun, Daxili İşlər Nazirliyinin, Tartu şəhər icra hakimiyyətinin, Uşaq Fondunun əməkdaşları, habelə “Kanal-2” televiziyasının “Subboteya” proqramının redaktorları və aparıcıları daxildir.
Azərbaycan Gənc Hüqüqşünaslar Birliyindən AZƏRTAC-a bildirmişlər ki, səfəri “Uşaqlar cinayətlər prosesində: hökumət və qeyri hökumət təşkilatlarının əməkdaşlığı” proqramı çərçivəsində Açıq Cəmiyyət - Yardım Fondu İnstitutu maliyyələşdirir. Estoniya kütləvi informasiya vasitələri nümayəndələrinin bu gəlişi, ilk növbədə, Azərbaycana səfərin Skandinaviya ölkələrində geniş surətdə işıqlandırılmasının nəzərdə tutulması ilə əlaqədardır. Həmin ölkələrin sakinlərinə Azərbaycanda həyata keçirilən demokratik dəyişikliklər və genişmiqyaslı islahatlar barədə məlumatlar veriləcəkdir. Nümayəndə heyətinə daxil olan “Kanal-2” teleşirkətinin əməkdaşları Skandinaviya ölkələrinin tamaşaçı auditoriyası üçün populyar verilişlər hazırlayan dövlətlərarası teleşirkətlərdən biri ilə yaradıcılıq əlaqəsi saxlayırlar. Səfər zamanı rəsmi şəxslər və kütləvi informasiya vasitələrinin nümayəndələri ilə bir sıra görüşlər keçirilməsi də nəzərdə tutulur.
Bölmənin digər xəbərləri
