Fənn müsabiqələri və məntiq olimpiadasında Şəki-Zaqatala bölgəsinin məktəbliləri 33 mükafat qazanıblar
Şəki, 2 iyul, AZƏRTAC
Məktəblilərarası fənn müsabiqələri və Lütfi Zadə adına riyaziyyat-məntiq olimpiadasının yekun nəticələrinə əsasən, Şəki-Zaqatala Regional Təhsil İdarəsinin tabeliyində fəaliyyət göstərən ümumtəhsil müəssisələrində təhsil alan şagirdlər 33 medal qazanıblar. Şagirdlərdən 5 nəfəri birinci, 10-u ikinci, 18 şagird isə üçüncü yerə layiq görülüb.
Bu barədə AZƏRTAC-ın bölgə müxbirinə Regional Təhsil İdarəsinin məsul əməkdaşı Mahal Məmmədov məlumat verib. Bildirilib ki, fənn müsabiqələri və məntiq olimpiadasında Şəki rayonu üzrə 18, Oğuz rayonu üzrə 5, Balakən rayonu üzrə 4, Zaqatala rayonu üzrə 3, Qax və Qəbələ rayonlarının hər biri üzrə isə 1 şagird medal qazanıb. Ayrı-ayrı fənlər üzrə götürdükdə isə şagirdlər informatika fənni üzrə 10, biologiya fənni üzrə 7, riyaziyyat, kimya və fizika fənlərinin hər biri üzrə 4, riyaziyyat-məntiq və təbiət fənlərinin hər biri üzrə isə 2 mükafat əldə ediblər.
Məktəblər arasında Şəki şəhəri Kimya-biologiya təmayüllü liseyinin şagirdləri yüksək nəticə göstərərək 13 mükafata sahib çıxıblar.
Müxbir – Mustafa Dadaşov
Bölmənin digər xəbərləri
