Fərid Cəfərov: Gənclər Günü dövlət tərəfindən ölkə gəncliyinə verilən qiymətin təzahürüdür
Bakı, 2 fevral, AZƏRTAC
Bu gün 2 Fevral - Azərbaycan Gənclər Günüdür və bu əlamətdar gün ölkəmizdə geniş şəkildə qeyd edilir. Rayon və kəndlərimizdə ümumilikdə bütün ölkə ərazisində qeyd edilən Gənclər Günü gənclərin bayramı olmaqla yanaşı, eyni zamanda, dövlət tərəfindən ölkə gəncliyinə verilən qiymətin təzahürüdür. Eyni zamanda, biz bu günü ölkə gəncliyinin il ərzində gördüyü fəaliyyətin geniş ictimaiyyətin diqqətinə çatdırma və hesabat günü kimi də dəyərləndirə bilərik.
Bunu AZƏRTAC-a məxsusi açıqlamasında Gənclər Fondunun icraçı direktoru Fərid Cəfərov deyib.
Bildirib ki, 1994-cü ildən Ulu Öndər Heydər Əliyevin təməlini qoyduğu müasir gənclər siyasəti 1996-cı ildə Gənclərin Birinci Forumunun keçirilməsi, 1997-ci ildə Gənclər Gününün təsis edilməsi, Dövlət Proqramlarının qəbul edilməsi və digər mühüm addımlarla ildən-ilə gücləndirildi. Xüsusi vurğulamaqda fayda var ki, Ümummilli Liderin uzaqgörən siyasəti və iradəsi nəticəsində ölkəmizdə Gənclər Gününün təsis edilməsi böyük hadisə idi. Çünki əksər Avropa ölkələrindən və hətta BMT-dən əvvəl Azərbaycan Gəncləri Günü təsis edilib. Bu il Ulu Öndər Heydər Əliyevin 100 illik yubileyi ərəfəsində ölkə gənclərinə ərməğan qoyduğu 2 Fevral - Gənclər Günü bu mənada xüsusi önəm daşıyır.
Əsası Ulu Öndər tərəfindən qoyulan dövlət gənclər siyasəti dövlətimizin başçısı İlham Əliyev tərəfindən hərtərəfli, daha geniş miqyasda və uğurla davam etdirilir. Gəncliyimizə hər sahədə elm, təhsil, məşğulluq, sahibkarlıq, innovasiya, özünüifadə, istedadların üzə çıxarılması, mədəniyyət və digər istiqamətlərdə geniş imkanlar, yeni-yeni platformalar yaradılır, proqramlar və layihələr tərtib edilərək icra olunur. Bu da ölkə gəncliyinin rəqabətqabiliyyətli olmasına və inkişafına səbəb olur. Bu siyasətin nəticəsidir ki, gənclərimiz də Ali Baş Komandan İlham Əliyevin daim bir əmrinə müntəzirdirlər və xalqımız üçün daim taleyüklü məsələlərdə dövlətimizin yanında olur. Buna biz həm COVID-19 pandemiyası, həm də Vətən müharibəsi zamanı şahidi olduq. Belə ki, həm ön cəbhədə savaşan qəhrəmanlarımızın mütləq əksəriyyəti, həm də arxa cəbhədə, xüsusilə də informasiya savaşında mübarizə aparanların böyük əksəriyyəti gənclərimiz idi.
Prezident İlham Əliyevin vurğuladığı kimi “Azərbaycan gəncləri fəaldır, vətənpərvərdir, biliklidir və savadlıdır”.
“Təmsil etdiyim Gənclər Fondu Prezident tərəfindən təsis edilən, gənclərin inkişafı üçün çalışan innovativ mexanizmdir. Artıq 10 ildən artıqdır ki, ölkə gənclərinə elm, təhsil, mədəniyyət, sosial və digər istiqamətlərdə xidmət göstərən Gənclər Fondu bundan sonra da gənclərimizin yanında olmağa, ölkə gənclərinə xidmət göstərməyə, onların elm, təhsil, mədəniyyət, sosial və digər sahələr üzrə fəaliyyətlərini stimullaşdırmağa davam edəcək.
Hər bir gəncimizi 2 Fevral - Azərbaycan Gəncləri Günü ilə bağlı təbrik edir, gənclərimizə sağlamlıq, nailiyyət və xoş həyat arzulayırıq”, - deyə Fərid Cəfərov qeyd edib.
Bölmənin digər xəbərləri
