FHN-in İdman-sağlamlıq klubunun il ərzində keçirdiyi yarışlarda 800 nəfər iştirak edib
Bakı, 16 oktyabr, AZƏRTAC
Fövqəladə Hallar Nazirliyinin (FHN) İdman-sağlamlıq klubu nazirliyin əməkdaşlarının, o cümlədən hərbi və xüsusi rütbəli qulluqçularının fiziki hazırlıq səviyyəsinin yüksəldilməsini, xidməti tətbiqi və digər idman növlərinin yaradılmasını və inkişafını təmin edən qurumdur.
FHN-in mətbuat xidmətindən AZƏRTAC-a bildirilib ki, ümumi ərazisi 14 min kvadratmetr olan idman kompleksində bütün zəruri infrastruktur -1950 tamaşaçı yerlik universal zal, 700 yerlik açıq havada futbol stadionu, 5 idman zalı (boks, güləş, karate, cüdo, fitnes), üzgüçülük hovuzu, 120 nəfərlik iclas və müşavirələrin keçirilməsi üçün akt zalı, konfrans zalı, idman nailiyyətləri üzrə muzey yaradılıb.
İdman-sağlamlıq klubu tərəfindən əsas diqqət nazirliyin hərbi qulluqçularının və xüsusi rütbəli əməkdaşların fiziki hazırlığının yüksəldilməsinin həyata keçirilməsinə yönəldilib. İdman-sağlamlıq klubunda 4 şöbə və 4 bölmə xidmət göstərir. Klubun əsas vəzifələrinə aid olan şəxsi heyətin fiziki hazırlığını, nazirliyin qurumları arasında peşə hazırlığının təcəssümü olan xidmətinin tətbiqi, kütləvi idman növləri üzrə yarışların təşkili və keçirilməsi aiddir. Bu məqsədlə il ərzində nazirliyin qurumları arasında 9 (şahmat, stolüstü tennis, çoxnövçülük, minifutbol, cüdo, beşnövçülük, səmti müəyyənetmə, voleybol, sərbəst güləş) yarış keçirilib. Bu yarışlarda 800-ə yaxın əməkdaş iştirak edib. Bundan başqa nazirliyin idmançı əməkdaşları respublika və beynəlxalq yarışlarda iştirak edərək yüksək nailiyyətlər qazanıblar. Belə ki, bu il ərzində cüdo, karate, güləş üzrə Avropa və dünya çempionatlarında 3 qızıl, 2 gümüş və 2 bürünc medal qazanılıb.
Qeyd edək ki, “Paris 2024” Yay Olimpiya Oyunlarının gümüş mükafatçısı Qaşım Maqomedov İdman-sağlamlıq klubunun üzvüdür.
Klubun fəaliyyət sahələrindən biri də idman təlim bölməsidir. Bu bölmə kütləvi idman növləri üzrə yüksək səviyyəli idmançıların hazırlanması sahəsində fəaliyyət göstərir. Belə ki, klubda taekvondo, boks, güləş, kikboksinq, cüdo, karate, gimnastika, növləri üzrə idman bölmələri yaradılıb. Həmin bölmələrdə 500-ə yaxın idmançı məşğul olaraq respublika çempionatlarında və beynəlxalq yarışlarda iştirak edirlər.
Klubun kütləvi idman növləri üzrə yığma komandası respublika üzrə daxili və beynəlxalq miqyaslı yarışlarda uğurlu iştirak edir.
Belə ki, FHN-in kişilərdən ibarət voleybol üzrə yığma komandası Rusiyanın paytaxtı Moskva şəhərində keçirilən I Dünya Korporativ Oyunlarında qızıl medalın sahibi olub. Bundan başqa, Gənclər və İdman Nazirliyinin təşəbbüsü ilə dövlət qurumları arasında Ümummilli Lider Heydər Əliyevin 100 illik yubileyinə həsr olunmuş mini futbol yarışında, voleybol, stolüstü tennis, çimərlik voleybolu, qolf, 3x3 basketbol, avarçəkmə, velosiped, padel, kamandan oxatma idman yarışlarında fəxri kürsünün ən yüksək pilləsinə qalxmağı bacarıblar.
Klubun bazasında müxtəlif idman növləri üzrə idman federasiyaları tərəfindən (taekvondo, cüdo, karate, güləş, futzal, basketbol) respublika birincilik və çempionatları, eləcə də beynəlxalq miqyaslı yarışlar keçirilir. 2019-cu ildə Avropa Gənclər Olimpiya Festivalının voleybol üzrə yarışları İdman-sağlamlıq klubun arenasında keçirilib.
Qeyd edək ki, FHN-in İdman-sağlamlıq klubu 2006-cı ildən fəaliyyətə başlayıb. 2018-ci il dekabrın 27-də Azərbaycan Respublikasının Prezidenti İlham Əliyevin iştirakı ilə İdman-sağlamlıq Mərkəzinin açılış mərasimi keçirilib.
Bölmənin digər xəbərləri
