Fidan Hacıyevanın II Beynəlxalq Opera Festivalında şəhid ailələrindən istedadlı uşaqlar iştirak ediblər
Bakı, 26 aprel, AZƏRTAC
Fidan Hacıyevanın II Beynəlxalq Opera Festivalının ikinci günü Qara Qarayev adına Mərkəzi İncəsənət Məktəbində keçirilib. “Qəlbimizdə yaşayanlar” adlı konsertdə istedadlı gənc vokalçılar, o cümlədən şəhid ailələrindən uşaqlar çıxış ediblər.
AZƏRTAC xəbər verir ki, gecədə Qara Qarayev adına İncəsənət Məktəbinin şagirdləri (44 günlük Vətən Müharibəsi veteranı Atəş Qarayevin sinfi) çıxış ediblər.
Konsertdə incəsənət məktəbinin orkestri iştirak edib, Opera Teatrının solisti Atəş Qarayev də daxil olmaqla incəsənət məktəbinin müəllimləri səhnəyə çıxıblar. Gecədə Azərbaycanın Xalq artisti Fidan Hacıyeva da çıxış edərək bəstəkar Könül Hüseynovanın Xalq şairi Vahid Əzizin sözlərinə yazılmış “Şuşam mənim” mahnısını ifa edib.
Beynəlxalq Opera Festivalının təşkilatçısı Fidan Hacıyeva AZƏRTAC-ın müxbiri ilə söhbətində şəhid ailələrindən olan uşaqların tədbirdə iştirakının vacibliyini vurğulayıb.
“Bu konsert çox xoş və səmimi şəraitdə keçdi. Heyrətamiz ab-hava yaranmışdı. Tədbirdə Qara Qarayev adına İncəsənət Məktəbindən istedadlı şagirdlər iştirak ediblər. Təbii ki, şəhid ailələrindən olan, çoxlu gözəl vətənpərvərlik mövzusunda mahnılar ifa edən uşaqlara böyük diqqət yetirilmişdi. Salonda bu uşaqların anaları, qəhrəmanlarımızın həyat yoldaşları iştirak edirdilər. Tamaşaçılar uşaqları ayaq üstə alqışlayırdılar”, - deyə Xalq artisti qeyd etdi.
Fidan Hacıyevanın II Beynəlxalq Opera Festivalı aprelin 23-dən 29-dək Bakıda keçirilir. Yeddi gün ərzində paytaxtın müxtəlif məkanlarında tanınmış xarici və azərbaycanlı ifaçıların, həmçinin gənc opera müğənnilərinin, eləcə də 6-16 yaş arası gənc istedadlıların iştirakı ilə konsertlər təşkil olunub.
Bölmənin digər xəbərləri
