Hansı nəsil həyəcanlı vəziyyətlərə daha həssasdır? – Psixoloq rəyi
Bakı, 7 avqust, AZƏRTAC
Hər birimiz zaman-zaman həyəcan keçiririk. Lakin həyəcan hissi ciddi psixoloji pozuntular olduğu anlamına gəlmir. Burada doğum ili və hansı nəslə mənsub olmaq amili də rol oynayır. Millenial (Y), Zumer (Z) və ya Alfa nəsillərinə aid insanların hansı birinin həyəcanla bağlı pozuntulara daha çox həssas olduğunu öyrənmək üçün AZƏRTAC-ın müxbiri 145 nömrəli ümumtəhsil məktəbinin uşaq psixoloqu Ofeliya Xıdırova ilə söhbət edib.
Şikayət etməməklə bağlı düşüncə tərzi Millenial nəslində problemləri gizlətmək vərdişi formalaşdırıb
Psixoloqun sözlərinə görə, əgər ruhi sağlamlığa nəsillər prizmasından nəzər salsaq, Millenial nəsli bu kontekstdə həyəcanla bağlı pozuntulara daha çox həssasdır. Buna müntəzəm iqtisadi böhranlar və karyera yüksəlişinin daimi axtarışı təsir göstərir. Onları bebi-bumerlər böyüdüb, sonuncular üçün isə ali təhsil və peşəkar uğur həmişə prioritet məsələlər olub.
Şikayət etməməklə bağlı düşüncə tərzinin təlqini bu insanları problemlərini gizlətməyə sövq edir. Onlar həyəcan simptomlarını şəxsiyyətlə bağlı xüsusiyyətlər və ya zəiflik əlaməti ilə tez-tez səhv salırlar ki, bu da həmin şəxsləri ancaq ekstremal hallarda peşəkar yardım almağa vadar edir.
Zumerlər daimi informasiya yüklənməsi ilə qarşılaşırlar
Ofeliya xanım hesab edir ki, Zumer nəsli depressiya və həyəcana qarşı daha həssasdır. “Onlar COVID-19 pandemiyası kimi böyük hadisələr dövründə böyüyüblər. Bu insanlar, həmçinin daimi informasiya yükü, sosial medianın təzyiqi ilə üzləşirlər, çünki burada özünü başqaları ilə müqayisə etmək adi haldır və gələcəklə bağlı qeyri-müəyyənlik hissi var”, - deyə o izah edir.
Alfa gözünü rəqəmsal mühitdə açan nəsildir
Alfa nəsli ilə bağlı psixoloq qeyd edir ki, bu kateqoriyaya mənsub olan insanlar hələ yetərli şüur səviyyəsinə çatmayıblar və bu səbəbdən müəyyən pozuntular barəsində danışmaq tezdir. Buna baxmayaraq, onlar tədqiqatçılar üçün böyük maraq doğurur, çünki bu insanlar doğuşdan etibarən tamamilə rəqəmsal mühitə məruz qalan ilk nəsildir.
Həyəcanla bağlı pozuntuların statistikasında artım müşahidə olunur
Agentliyin həmsöhbətinin sözlərinə görə, bu gün gənclər əqli sağlamlıq problemlərini açıq şəkildə müzakirə edirlər. Bu, bir tərəfdən internetdə məlumatların mövcudluğu ilə bağlıdır. İnsanlar narahatlıq, depressiya və emosional tükənmə barədə daha çox məlumatlı olublar və psixoterapiyanın populyarlığı kömək istəmək qorxusunu azaldıb. Digər tərəfdən, normal həyat təcrübələrini patologiya ilə qarışdırmaq, məsələn, imtahandan əvvəl təbii həyəcan hissini və ya ayrılıqdan sonrakı kədəri klinik depressiyaya bərabər tutmaq meyli artmaqdadır.
Psixoloq əlavə edib ki, həyəcanla bağlı pozuntu statistikası həqiqətən də artıb, lakin bu, indiki nəslin əvvəlkilərdən obyektiv olaraq zəif olduğu anlamına gəlmir. “Sadəcə, insanlar problemlər haqqında ucadan danışmağa başlayırlar. Millenial nəslinə mənsub olanlar da həyəcandan eyni dərəcədə əziyyət çəkirdilər, amma onlar susurdular, utanırdılar və ya sadəcə hisslərini etiraf edə bilmirdilər. Bunun əksinə olaraq, bugünkü gənclər lazım olan məlumatları asanlıqla tapır və kömək istəməkdən çəkinmirlər”, - deyə O. Xıdırova sözlərini yekunlaşdırıb.
Müəllif – Leyla Muradzadə
Bölmənin digər xəbərləri
