Fikrət Südeyifzadə: Şahmatçı qızlarımız kifayət qədər yaxşı formadadırlar
Bakı, 7 avqust, Leyla Qurbanova, AZƏRTAC
Azərbaycanın qadınlardan ibarət milli komandası bu ilin altı ayı ərzində bir neçə mühüm yarışda iştirak edərək nailiyyətlər qazanıblar. Fevralın əvvəlində komanda üzvlərinin iştirakı ilə Azərbaycan çempionatı keçirildi, Günay Məmmədzadə, Xanım Balacayeva və Gövhər Beydullayeva ilk üç pillədə qərarlaşdılar. Aprelin ikinci yarısında Antalyada şəxsi Avropa çempionatında şahmatçılarımız da mübarizə apardılar. Təmsilçilərimizin bu yarışlarda çıxışını uğurlu adlandırmaq olar.
Bu sözləri qadınlardan ibarət yığma komandanın baş məşqçisi Fikrət Südeyifzadə AZƏRTAC-a müsahibəsində deyib.
O bildirib ki, qitə çempionatında Türkan Məmmədyarova, Ülviyyə Fətəliyeva, həm də növbəti dünya kubokuna vəsiqə qazandılar. Ötən il komandamızın digər üzvü Günay Məmmədzadə də bu nüfuzlu yarışa vəsiqəni təmin edib. Bundan başqa, komandamızın üzvləri Naxçıvanda Heydər Əliyevin xatirəsinə həsr olunmuş ənənəvi şahmat festivalında çıxış ediblər. Zeynəb Məmmədyarova qadınlar arasında ən yaxşı nəticə göstərərək mükafata layiq yer tutub.
Baş məşqçi vurğulayıb ki, iyulun əvvəlində qadın komandamızın Almaniya millisi ilə yoldaşlıq matçında əldə etdiyi qələbə millimizin yaxşı formada olduğunu göstərir: “Azərbaycan milli komandası Almaniyada bu ölkənin yığması ilə qarşılaşıb. Bakıda olduğu kimi, bu dəfə də matç komandamızın qələbəsi ilə başa çatıb - 17,5:7,5. Xatırladım ki, analoji qarşılaşma 2017-ci ilin avqustunda Bakıda keçirilib. Həmin görüş yığmamızın 15,5:9,5 hesablı qələbəsi ilə nəticələnmişdi. Qeyd edim ki, Almaniya komandası dünya şahmatının liderlərindən olmasa da, ilk onluğa daxil olan komandalardan biridir. Bu, göstərir ki, şahmatçı qızlarımız kifayət qədər yaxşı formadadırlar”.
Şahmat komandamızın qarşıdakı yarışlarda iştirakından da danışan baş məşqçi deyib: “Oktyabrın 23-dən noyabrın 6-dək Batumidə komandalar arasında Avropa çempionatı keçiriləcək. Qızların əksəriyyəti bu yarışda iştirak edəcək. Şahmatçılarımız daha sonra Avropa komanda kubokunda gücünü sınayacaq. Bu yarışlar isə noyabrın 9-dan 20-dək Monteneqronun Budva şəhərində keçiriləcək. Qadınlardan ibarət milli komanda bir dəfə klub çempionatında ikinci olub. Komandamız bu nəticəni yenidən təkrarlamaq istəyir. Avropa çempionatında da medal qazanmağın vaxtı çatıb. Son illər şahmatçı qızlarımız komanda çempionatında ənənəvi olaraq ilk onluqda yer almağı bacarıblar. Ümid edirəm ki, şahmatçı qızlarımız bu yarışlarda da uğurla çıxış edəcəklər”.
Bölmənin digər xəbərləri
