Firəngiz Əlizadə: Xocalı faciəsi tariximizin kədərli səhifəsidir
Bakı, 25 fevral (AZƏRTAC). Azərbaycan Bəstəkarlar İttifaqında Xocalı qurbanlarının xatirəsi yad edilmişdir.
AZƏRTAC-ın verdiyi xəbərə görə, Bəstəkarlar İttifaqının sədri, Xalq Artisti, professor Firəngiz Əlizadə qeyd etmişdir ki, Xocalı faciəsi tariximizin kədərli səhifəsidir. Bu faciəli hadisəyə heç kəs biganə qala bilməz. Bu mövzuya bir çox incəsənət xadimləri müraciət etmişlər, kitablar yazılmış, rəsmlər və filmlər çəkilmişdir. Bəstəkarlar da kənarda qalmamışlar.
90-cı illərdən başlayaraq indiyədək Xocalıya həsr olunmuş bir çox musiqi əsəri yazılmışdır.
Tədbirdə iki əsər - bəstəkar Şəhrun Süleymanovanın sözlərinə Rəna Qədimovanın xor və simfonik orkestr üçün yazdığı “Sarı gəlin” balladası və Məhsəti Gəncəvinin sözlərinə Faiq Nağıyevin xor üçün yazdığı “Şamın iniltisi” əsəri ifa edilmişdir.
Rəna Qədimova əsərini ərsəyə gəlməsindən danışmış və özü ilk dəfə olaraq onu fortepianoda ifa etmişdir.
Sonra bir neçə il bundan əvvəl Faiq Nağıyevin xor üçün yazdığı əsərin audiolenti səsləndirilmişdir.
Əsər bu gün də öz aktuallığını itirməmişdir, Xocalı faciəsinin və bütün müharibə qurbanlarına rekviyem kimi səslənir.
Bölmənin digər xəbərləri
