FİZİKA FƏNNİ ÜZRƏ TEST TAPŞIRIQLARI ELMİ-METODİKİ VƏ STATİSTİK CƏHƏTDƏN TƏHLİL OLUNMUŞDUR
Tələbə Qəbulu üzrə Dövlət Komissiyasında (TQDK) fizika fənni üzrə elmi-metodiki seminar keçirilmişdir.
TQDK-dan AZƏRTAC-a bildirmişlər ki, təhsil müəssisələri və Azərbaycan Milli Elmlər Akademiyası nümayəndələrinin iştirak etdikləri seminarda bu il ali məktəblərin IV ixtisas qrupu üzrə qəbul imtahanında fizika fənnindən istifadə edilmiş test tapşırıqları elmi-metodiki və statistik cəhətdən təhlil olunmuşdur.
A və B variantındakı test tapşırıqları ətraflı müzakirə edilmişdir.
Təhlillər göstərmişdir ki, abituriyentlərin bir qismi yüklü zərrəciklərin maqnit sahəsində hərəkətinə, elektromaqnit rəqsləri və dalğalarına, bölmələrarası genetik əlaqəyə, müxtəlif mühitlərdə elektrik cərəyanına, elektrik sahəsinə və nisbilik nəzəriyyəsinin elementlərinə aid keyfiyyət xarakterli fiziki prosesin mahiyyətinin açılmasını tələb edən test tapşırıqlarına cavab verməkdə çətinlik çəkmişlər.
Çıxış edən mütəxəssis və müəllimlərin fikrincə, ümumiyyətlə, əksər abituriyentlər hadisələrin fiziki mahiyyətini, müxtəlif fiziki hadisələr arasında səbəb-nəticə əlaqələrini açmağa dair daha çox məntiqi düşüncəyə əsaslanan, nəzəri biliklərin tətbiqini tələb edən keyfiyyət xarakterli test tapşırıqlarına zəif cavab verir və ya onlardan imtina edirlər.
A və B variantındakı test tapşırıqları oxşar olduğundan, hər iki variantda abituriyentlərin cavabları bir-birinə müvafiqdir.
Bölmənin digər xəbərləri
