FÖVQƏLADƏ HALLAR NAZİRLİYİNİN NÜMAYƏNDƏ HEYƏTİ FRANSADA İŞGÜZAR SƏFƏRDƏ OLMUŞDUR
Tanışlıq xarakteri daşıyan səfərin ilk günü general-polkovnik Kəmaləddin Heydərov və nümayəndə heyətinin üzvləri Fransa Mülki Müdafiə və Təhlükəsizlik İdarəsinin beynəlxalq əlaqələr missiyasında olmuşlar. Fransa Daxili İşlər Nazirliyinin əsas strukturlarından biri olan ölkənin ümumi təhlükəsizlik məsələlərinin həllində yaxından iştirak edən nüvə qurğularının və mərkəzlərinin mühafizəsini, əhalinin təhlükəsizliyini həyata keçirən bu idarənin işi ilə yaxından tanışlıqdan sonra Böhranların İdarə olunması üzrə Nazirliklərarası Əməliyyat Mərkəzinə gəlmişlər. Burada Kəmaləddin Heydərova mərkəzin fəaliyyət istiqamətləri, funksiyaları barədə ətraflı məlumat verilmişdir.
Sonra Fransa Yanğınsöndürmə Zabitləri Milli Ali Məktəbində olan nazir Kəmaləddin Heydərov peşəkar yanğınsöndürənlərin hazırlanmasında xüsusi yeri olan tədris ocağının iş prosesini izləmişdir. Söhbət əsnasında ali məktəb rəhbərliyi azərbaycanlı mütəxəssislərin burada təhsil almaları ilə bağlı fikirlərini bildirmişdir. Təklifi müsbət qarşıyalan nazir Kəmaləddin Heydərov, Fransa təcrübəsindən azərbaycanlı mütəxəssislərin yararlanacağına əminliyini bildirmişdir.
İyunun 13-də nümayəndə heyətimiz Fransa Daxili İşlər Nazirliyi UAZ departamenti yanğın və yardım xidmətinin rəhbərliyi ilə görüşmüşdür. Görüşdə tərəflər hər iki ölkənin uyğun qurumlarının strukturu, funksiyaları, fəaliyyət istiqamətləri barəsində qarşılıqlı fikir mübadiləsi aparmışlar. Nümayəndə heyətimiz, xidmətin maddi texniki bazası ilə yaxından tanış olmuşdur.
Azərbaycan Fövqəladə Hallar Nazirliyinin maddi-texniki bazasının müasirləşdirilməsi ilə bağlı “GİMAEX”, “SİDES”, “VPS”, “Renault Eport” şirkətləri ilə danışıqlar aparılmışdır. Danışıqlarda Nazirliyin mülki müdafiə və təhlükəsizlik texnologiyalarına olan ehtiyacı təhlil olunmuşdur. Azərbaycan tərəfi Fransa yanğınsöndürünlərin bu ilin oktyabr ayında ölkənin Po şəhərində keçiriləcək Milli Konqresinə dəvət olunmuşdur.
Fövqəladə hallar naziri Kəmaləddin Heydərov iyunun 14-də Fransa Daxili İşlər Nazirliyi Milli Jandarmeriyanın Beynəlxalq Əməkdaşlıq İdarəsinin rəhbərliyi ilə görüşmüş, qarşılıqlı maraq doğuran məsələlər ətrafında fikir mübadiləsi aparmış, əməkdaşlıq barədə razılıq əldə olunmuşdur.
Həmin gün nazir Kəmaləddin Heydərovun Fransa daxili işlər nazirinin müavini Kristian Estrozi ilə görüşü olmuşdur. Fransa Daxili İşlər Nazirliyində keçirilən görüşdə Kristian Estrozi daxili işlər naziri Nikola Sarkozinin adından Kəmaləddin Heydərovu salamlamış, Azərbaycanın Fövqəladə Hallar Nazirliyi ilə yaranan əməkdaşlığı yüksək qiymətləndirmişdir.
Nazir Kəmaləddin Heydərov Azərbaycan ilə Fransa arasında mövcud iqtisadi, siyasi və mədəni əlaqələri xatırlatmış, dövlətimizin rəhbərliyinin dost ölkələrimiz arasında yaranmış tarixi bağlılıq ənənəsini davam etdirdiyini söyləmişdir. O demişdir ki, Azərbaycan müstəqilliyini bərpa etdikdən sonra yenidən hakimiyyətə qayıdan ulu öndərimiz Heydər Əliyev və Prezident İlham Əliyev ilk rəsmi səfərlərini məhz Fransaya etmişlər. Kəmallədin Heydərov ölkələrimiz arasında yaranan və inkişaf edən əlaqələrin fövqəladə hallar qurumları arasında da genişlənəcəyinə əminliyini ifadə etmişdir.
Nazir Kəmaləddin Heydərov Azərbaycanda Fövqəladə Hallar Nazirliyinin yaradılmasını zəruri edən amillərdən danışmış, Prezident İlham Əliyevin müvafiq Sərəncamı ilə təşkil edilən yeni qurumun məqsədinin əlaqədar orqanların fəaliyyətinin vahid mərkəzdən idarə edilməsi olduğunu diqqətə çatdırmış, səfər çərçivəsində keçirdiyi görüşlərdən razı qaldığını söyləmiş, mülki təhlükəsizlik və müdafiə sahəsində Fransa təcrübəsinin öyrənilməsinin xüsusi əhəmiyyət daşıdığını bildirmiş, mütəxəssis mübadiləsinin vacibliyinə toxunmuşdur.
Nazir müavini Kristian Estrozi Kəmaləddin Heydərovun təklifini yüksək qiymətləndirmiş, bu ilin iyul ayında bir qrup fransız ekspertin Azərbaycana səfərinin təşkil ediləcəyini diqqətə çatdırmışdır. K.Estrozi əmin olduğunu bildirmişdir ki, bu əməkdaşlıq hər iki tərəf üçün faydalı olacaqdır. Azərbaycanın Fövqəladə Hallar Nazirliyi məsuliyyət, səlahiyyət və fəaliyyət genişliyi baxımından Fransada böyük maraq doğurub və fransız strukturları da öz növbəsində onun təcrübəsindən yararlanmaq imkanı əldə edəcəkdir. Hər iki tərəf bu ilin sonunadək K.Estrozinin Azərbaycana səfəri çərçivəsində ikitərəfli əməkdaşlıq sazişinin imzalanmasında maraqlı olduqlarını bildirmişlər.
Nazir müavini milli təhlükəsizlik və müdafiə məsələlərinin bu günlərdə Avropa İttifaqı səviyyəsində Lüksemburqda müzakirə obyekti olduğunu xatırlatmış, bu müzakirələrin Avropa İttifaqı və digər dost ölkələr arasında aparılmasının çox müsbət hal olduğunu, bu baxımdan Azərbaycan nümayəndə heyətinin Fransaya səfərinin böyük maraq doğurduğunu vurğulamışdır.
Azərbaycanın Fransadakı səfiri Tarik Əliyev görüşlərdə iştirak etmişdir.
Bölmənin digər xəbərləri
