Azərbaycanın yanacaq və energetika naziri Məcid Kərimov aprelin 18-20-də Fransada işgüzar səfərdə olmuşdur. 

M.Kərimov səfər çərçivəsində Fransanın sənaye məsələləri üzrə dövlət katibi, nazir Kristian Pyerre ilə görüşmüşdür. Cənab K.Pyerre bir neçə il əvvəl Bakıda səfərdə olduğunu, Azərbaycan Prezidenti Heydər Əliyev tərəfindən qəbul edildiyini, bu görüşün ona böyük təsir bağışladığını xüsusi vurğulamışdır. Dövlət katibi Fransa şirkətlərinin ölkəmizdəki fəaliyyətlərini davam və inkişaf etdirmək əzmində olduqlarını bildirmişdir.

M.Kərimov ölkəmizin yeni neft strategiyasının Fransa-Azərbaycan iqtisadi əlaqələrinin, habelə Azərbaycanın digər ölkələrlə münasibətlərinin inkişafına geniş imkanlar yaratdığını bildirmişdir. O, Bakı-Ceyhan, Bakı-Ərzurum ixrac neft və qaz kəmərləri layihələrinin reallaşdırılması sahəsində görülən işlər barədə məlumat vermişdir.

Görüşdə ölkəmizin Fransadakı səfiri Eleonora Hüseynova iştirak etmişdir.

Səfər müddətində M.Kərimov respublikamızla əməkdaşlıqda maraqlı olan “TotalFinaElf”, “Qaz de Frans”, “Elektrisite de Frans” şirkətlərinin və Fransa Neft İnstitutunun və sair qurumların nümayəndələri ilə də görüşlər keçirmişdir.

Əsgər Əliyev

AZƏRTAC-ın xüsusi müxbiri