Fransada tufan olub, 26 min ev elektrik enerjisiz qalıb
Paris, 21 avqust, AZƏRTAC
Fransanın cənub-şərqində güclü tufan olub.
AZƏRTAC xəbər verir ki, şiddətli yağış, lokal daşqınlar və elektrik enerjisinin kəsilməsi, xüsusilə Var və Alp-Maritim departamentlərində ciddi problemlər yaradıb.
Var departamentində 26 minədək ev elektrik enerjisiz qalıb. Yağıntıların miqyası da qeyri-adi olub. Alp-Maritim departamentinin Leven şəhərində 24 saat ərzində 130 millimetr, Nitsada 44, Carrosda isə 60 millimetr yağış qeydə alınıb. Varda Draginan və Seyan ərazilərində yağıntıların miqdarı 75–80 millimetrə çatıb. Bu göstəricilər 2010-cu ilin iyununda qeydə alınmış 75 millimetrlik rekordu keçib.
Alp-Maritim prefekti daşqın riski yüksək olan ərazilərdəki düşərgələrin əvvəlcədən boşaldılmasına dair göstəriş verib. Peqoma şəhərində təxminən 200 nəfər təhlükəsiz əraziyə yerləşdirilib. Antibdə isə daha 155 nəfər təxliyə olunub.
Varda isə ildırımın səbəb olduğu bir neçə yanğın hadisəsinə görə yanğınsöndürənlər səfərbər edilib.
Güclü yağışlardan sonra Aralıq dənizi sahilində bir sıra bələdiyyələr çimərliklərdən istifadəni müvəqqəti qadağan edib.
Hakimiyyət yağış sularının axını və kanalizasiya sistemlərinin yuyulması nəticəsində çirklənmə riskinin yarandığını bildirib. Antibdə analizlərin nəticələri əldə edilənədək çimərliklərin bağlı qalması nəzərdə tutulub.
Korsikada da əlverişsiz hava şəraiti nəqliyyatda problemlərə səbəb olub. Bastia və Kalvi şəhərlərində bir neçə aviareys ləğv edilib, təxminən 1360 nəfər qabaqlayıcı tədbir kimi təhlükəsiz ərazilərə yerləşdirilib.
Hakimiyyət əhalini ehtiyatlı olmağa çağırır.
Bölmənin digər xəbərləri
