HTP qalibi: Çin dilinə marağım məni yenidən Şanxaya aparır
Bakı, 21 avqust, AZƏRTAC
Azərbaycan Respublikasının Elm və Təhsil Nazirliyi ilə Çin Xalq Respublikasının Təhsil Nazirliyi arasında əməkdaşlıq haqqında Saziş çərçivəsində 2026–2027-ci tədris ilindən Hökumətlərarası Təqaüd Proqramı (HTP) əsasında Çində təhsil alacaq gənclərdən biri də Aytac Səfərlidir. Xəzər Universitetini ingilis dili tərcümə ixtisası üzrə bu il bitirən Aytac Səfərli Çin dilinə olan marağını təhsillə birləşdirərək artıq ikinci dəfə bu ölkədə ali təhsil almağa hazırlaşır.
Onun Çinlə bağlı təhsil yolu universitetin ikinci kursunda ikinci dil seçimi ilə başlayıb. Çin dilini seçməsi, daha sonra bu dili Çində öyrənməsi və indi isə magistratura təhsili üçün yenidən həmin ölkəyə qayıtması Aytacın qarşısına qoyduğu məqsədlərin ardıcıl şəkildə formalaşdığını göstərir.
Aytac Səfərli AZƏRTAC-a müsahibəsində bildirib ki, Çin dilinə və mədəniyyətinə olan marağı onun bu dili öyrənməyə başlamasında əsas amillərdən olub. Dərsləri Konfutsi İnstitutundan gələn çinli müəllimlərin keçdiyini deyən müsahibimiz məhz onların vasitəsilə “Beynəlxalq Çin Dili Müəllimi” təqaüd proqramı haqqında məlumat əldə etdiyini söyləyib.
“Çin universitetində təhsil almaq və ölkənin mədəniyyəti ilə yaxından tanış olmaq imkanı məni Çin dili səviyyə imtahanına (HSK4) hazırlaşaraq proqrama müraciət etməyə həvəsləndirdi və Şanxay Beynəlxalq Araşdırmalar Universitetindən qəbul təklifi aldım. 2024–2025-ci illərdə Çində dil üzrə təhsil aldım. Bu müddətdə qazandığım təcrübə və dostluqlar vasitəsilə HTP haqqında məlumat əldə etdim. Çindəki təhsil təcrübəmi davam etdirmək və dil biliklərimi daha da inkişaf etdirmək istədiyim üçün ölkəmizə qayıtdıqdan sonra HTP-yə magistratura proqramı üçün müraciət etdim. Seçim prosesi zamanı qəbulun necə rəqabətli olduğunu bir daha anladım. Fikrimcə, ən çətin mərhələ müsabiqənin yekun cavabını gözləmək idi. Çünki daim gözləmə içərisində olmaq məni çox gərgin edirdi.
Şanxay Pedaqoji Universitetində (Shanghai Normal University) Beynəlxalq Çin Dili Təhsili üzrə magistratura proqramına qəbul oldum. Daha əvvəl Şanxayda bir il təcrübəm olduğu üçün bu şəhər mənə ikinci ev kimidir. Buna görə də Şanxaya qayıdacağımı düşünürdüm. Şanxay Pedaqoji Universiteti də bu sahə üzrə ixtisaslaşmış ali məktəblərdən biridir. Bu ixtisası seçməyimin əsas səbəbi isə Çin dilinə və bu ölkəyə olan böyük sevgimdir.
Mənə elə gəlir ki, Çində tələbə olmaq çox gözəl hissdir. Orada təhlükəsiz, əyləncəli və maraqlı fəaliyyətlərlə dolu tələbə həyatı yaşamaq mümkündür. Ən önəmlisi isə Çin çox gözəl ölkədir və onun hər bir bölgəsini görməyə dəyər”, - deyə müsahibimiz qeyd edib.
HTP qalibi Çində magistratura təhsili müddətində qarşısına bir neçə məqsəd qoyduğunu qeyd edib. Çin dilini daha da inkişaf etdirmək, bu dilin HSK6 imtahanında yüksək nəticə göstərmək, həmçinin müxtəlif ölkələrdən yeni insanlarla tanış olaraq beynəlxalq əlaqələrini gücləndirmək əsas hədəfləri sırasındadır.
Aytac Səfərli əldə etdiyi bilik və təcrübəni gələcəkdə Azərbaycanda tətbiq etmək, xüsusilə gənclərin Çin dilini daha rahat və maraqlı şəkildə öyrənməsinə töhfə vermək istədiyini bildirib. Müsahibimiz azərbaycanlı tələbələr üçün Çin dilini öyrənməyi əyləncəli, maraqlı və asan formaya gətirmək istəyir. Əgər məktəblər üçün Çin dili dərslikləri yaradılarsa, buna öz töhfəsini vermək istəyir.
Həmsöhbətimiz xaricdə təhsil almaq istəyən gənclərə özünə inanmağı və qarşıya qoyulan məqsədə çatmaq üçün bu yoldan çəkilməməyi tövsiyə edib: “Yolun çətinliyi sizi qorxutmasın, əgər özünüzə inanırsınızsa, heç bir çətinlik sizi arxaya aparmayacaq. Məqsədlərinizə çatmaq üçün daim əlinizdən gələni edin və ümidinizi itirməyin. Ümid həmişə sizin yolunuza işıq tutacaq”.
Müxbir - Nərmin Muradzadə
Bölmənin digər xəbərləri
