Futbol üzrə İtaliya millisi “Avro-2016”ya vəsiqəni Bakıda rəsmiləşdirib
Bakı, 10 oktyabr, AZƏRTAC
Oktyabrın 10-da futbol üzrə “Avro-2016”nın seçmə mərhələsi çərçivəsində “H” qrupunda yer alan Azərbaycan və İtaliya yığma komandaları qarşılaşıb.
AZƏRTAC xəbər verir ki, Bakı Olimpiya Stadionunda keçirilən görüşdə İtaliya millisi 3:1 hesabı ilə qalib gələrək 2016-cı ildə Fransada keçiriləcək Avropa çempionatına vəsiqəni rəsmiləşdirib.
Azərbaycan millisinin ilk onbirliyində Kamran Ağayev, Bədavi Hüseynov, Maksim Medvedev, Rəşad Sadıqov, Arif Daşdəmirov, Qara Qarayev, Eddi İsrafilov, Dmitri Nazarov, Rahid Əmirquliyev, Əfran İsmayılov və Ruslan Qurbanov meydana çıxıblar.
İtaliya yığmasının start heyətində isə Canluici Buffon, Mattia de Şiliyo, Corco Kyellini, Matteo Darmian, Leonardo Bonuççi, Antonio Kandreva, Marko Verratti, Marko Parolo, Qrasiano Pelle, Stefan Əl Şaaravi və Eder yer alıblar.
Oyundan əvvəl arenaya gələn azarkeşlərə futbol üzrə İtaliya yığmasının 1934-cü, 1938-ci, 1982-ci və 2006-cı illərdə dünya çempionatlarında qazandığı kuboklar nümayiş etdirilib.
Komandalar meydana çıxdıqdan sonra Azərbaycan yığmasının heyətində 100-cü oyununu keçirən kapitan Rəşad Sadıqova AFFA prezidenti Rövnəq Abdullayev tərəfindən xatirə hədiyyəsi təqdim olunub.
Oyun ilk dəqiqələrdən qarşılıqlı hücumlarla başlayıb. Qarşılaşmanın 6-cı dəqiqəsində komandamızın hücumu zamanı Rahid Əmirquliyevin vurduğu topu qapıçı Canluici Buffon tutub. Beş dəqiqə sonra sol cinahdan rəqibin cərimə meydançasına daxil olan R.Əmirquliyevin qapıya zərbəsini əfsanəvi qapıçı yenə dəf edib.
Oyunda hesab 11-ci dəqiqədə açılıb. Marko Verrattinin uzun ötürməsindən sonra qapıçı Kamran Ağayev ilə təkbətək qalan Eder komandasını hesabda irəli çıxarıb - 0:1. Ardıcıl hücumlarını davam etdirən italiyalılar beş dəqiqə sonra daha bir qol vəziyyəti yaradıblar. Lakin Qrasiano Pellenin zərbəsini dəf edən Kamran Ağayev topu meydandan çıxara bilib.
Görüşün 31-ci dəqiqəsində Dmitri Nazarov rəqib müdafiəçilər Corco Kyellininin və Leonardo Bonuççinin çaşqınlığından istifadə edərək hesabı bərabərləşdirib - 1:1.
Qoldan sonra dördqat dünya çempionları hücumlarının sayını daha da artırıblar. Stefan Əl Şaaravi bir neçə dəfə fərqlənmək imkanı qazansa da, istəyinə 43-cü dəqiqədə çatıb və Antonio Kandrevanın ötürməsindən sonra komandasını yenidən hesabda irəli çıxarıb - 1:2.
İlk hissə bu hesabla da başa çatıb.
Nisbətən sakit məcrada davam edən ikinci yarıda ilk ən təhlükəli vəziyyət görüşün 62-ci dəqiqəsində yaranıb. Müdafiəçilərimizin uğursuz süni ofsayd yaratmaq cəhdindən sonra Kamran Ağayev ilə təkbətək qalan Eder topu boş qapıya göndərsə də, millimizin kapitanı Rəşad Sadıqov son anda özünü yetirərək komandamızı qoldan xilas edib. Lakin üç dəqiqə sonra Matteo Darmian komandasının üçüncü qolunu vurub - 1:3. Bu, gənc futbolçunun İtaliya millisinin heyətində ilk qolu olub.
Oyunun 70-ci dəqiqəsində komandamızın yeganə qolunun müəllifi olan Dmitri Nazarov rəqib müdafiəçilərinin əhatəsindən qapıya zərbə vurmağa imkan tapsa da, Buffon topu dəf edib. Qarşılaşmanın 76-cı dəqiqəsində komandamızın başlatdığı hücumda Rahid Əmirquliyevin zərbəsi müdafiəçilərə toxunaraq meydanı tərk edib. Görüşün 88-ci dəqiqəsində isə Bədavi Hüseynov qırmızı vərəqə ilə cəzalandırılıb.
Beləliklə, Bakıda Azərbaycan yığmasına 3:1 hesabı ilə qalib gələrək xallarının sayını 21-ə çatdıran İtaliya millisi “Avro-2016”nın final mərhələsində oynamaq hüququnu təmin edib.
Hesabında 6 xal olan Azərbaycan yığmasının qrupdakı mövqeyi dəyişməyib.
Oyunun baş hakimi şotlandiyalı Villiam Kollum olub. Onun köməkçisi funksiyasını Damien Makkrait (İrlandiya) və Fransis Konnor (Şotlandiya) yerinə yetiriblər.
Komandamızın yer aldığı “H” qrupunda Norveç millisi doğma meydanda Malta yığmasına 2:0 hesabı ilə qalib gəlib. Oslodakı “Ullevaal” stadionunda keçirilən matçda Aleksandr Tetti və Aleksandr Soderlund fərqləniblər. Bu qələbə ilə Norveç millisi də turnir cədvəlindəki xallarının sayını 19-a çatdıraraq Avropa çempionatına vəsiqə qazanıblar.
Qeyd edək ki, “A” qrupu çərçivəsində Reykyavikdə oynanılan matçda İslandiya millisi Latviya yığmasını qəbul edib. Növbəti mərhələyə vəsiqəni təmin edən İslandiya millisi meydandan heç-heçə ilə ayrılıb - 2:2.
Bu qrupun digər oyununda isə “Astana Arena”da Hollandiya yığmasını qəbul edən Qazaxıstan millisi 0:2 hesabı ilə məğlub olub. Hollandiya millisinin qollarını Uesli Snayder və Georginio Viynaldum vurublar.
Bölmənin digər xəbərləri
