GƏLƏN İLİN DÖVLƏT BÜDCƏSİ LAYİHƏSİNİN MÜZAKİRƏSİ BAŞA ÇATMIŞDIR
Əvvəlcə, Milli Məclisin sədri Murtuz Ələsgərov 18 oktyabr - Dövlət Müstəqilliyi günü münasibətilə Azərbaycan xalqını təbrik etdi, deputatlar adından Prezidentə təbrik məktubu göndəriləcəyini bildirdi.
Sonra maliyyə naziri Əvəz Ələkbərov çıxış edərək, gələn ilin dövlət büdcəsinin layihəsi ilə bağlı deputatların qaldırdıqları məsələlərə aydınlıq gətirmişdir. O demişdir ki, gələn ildən etibarən dövlət büdcəsindən ayrılan dolayı subsidiyaların məbləği azaldılacaq, dividendlə işləyən təşkilatların hamısı mənfəətlərindən dividend ödəyəcəklər. Qarşıdakı illərdə təbii qaz, su təchizatı, yol və körpülərin tikintisi və digər məsələlər də həllini tapacaqdır. Ətraf mühitin mühafizəsinə gəldikdə isə, ölkəmizin Prezidentinin tapşırığına əsasən, problem diqqətlə öyrənilir və 2007-2008-ci illərdə bu sahəyə əhəmiyyətli dərəcədə vəsait ayrılacaqdır.
Nazirin sözlərinə görə, yeni məktəblərin tikintisi, maddi texniki bazasının genişləndirilməsi və yenidən qurulması ilə bağlı büdcədə vəsait nəzərdə tutulsa da, bu məsələlər tam həllini sərmayə layihələri çərçivəsində tapacaqdır.
Ə.Ələkbərov onu da bildirmişdir ki, bu günlərdə Nazirlər Kabinetinin qərarı ilə minimum əmək haqqı artırılmışdır və bu artım təkcə minimum əmək haqqı alanlara deyil, tarif dərəcəsi ilə 1-dən 19-cu dərəcəyə qədər əmək haqqı alanların hamısına şamil olunacaqdır.
Sonra iqtisadi inkişaf naziri Fərhad Əliyev respublikada salınacaq sənaye şəhərciyi, ayrı-ayrı rayonların su təchizatı, regionların inkişafı ilə bağlı hazırlanan layihələr, Milli Bankın idarə heyətinin sədri Elman Rüstəmov isə rəhbərlik etdiyi qurumun valyuta siyasəti, manatın möhkəmləndirilməsi istiqamətində atılacaq addımlar barədə deputatlara ətraflı məlumat vermişlər.
Günün ikinci yarısında müzakirələr davam etdirilmişdir.
Müxtəlif nazirliklərin və dövlət komitələrinin rəhbərləri deputatların qaldırdıqları məsələlərə münasibətlərini bildirdi, onların suallarına cavab vermişlər.
Rabitə və informasiya texnologiyaları naziri Əli Abbasov sahənin inkişafından, rabitə bazarının genişləndirilməsindən danışmışdır. O, əminliklə bildirmişdir ki, rabitə sahəsi yaxın gələcəkdə neftdən sonra ölkə iqtisadiyyatının ən üstün sahəsinə çevriləcəkdir.
Nazir rabitə sahəsində özəlləşdirmə məsələsindən də bəhs edərək, xüsusi vurğulamışdır ki, bu, yalnız modernləşdirmə yekunlaşdırıldıqdan sonra baş tuta bilər. Natiq beynəlxalq, habelə mobil danışıqların qiyməti, mobil rabitə bazarına üçüncü operatorun gəlişi, internetdən istifadə, abonent haqqı, lokal danışıqların ödənişli olub-olmayacağı barədə sualları da ətraflı cavablandırmışdır.
Əmək və əhalinin sosial müdafiəsi naziri Əli Nağıyev ünvanlı sosial yardım, o cümlədən uşaq müavinəti, yaşayış minimumu, ehtiyac zənbili, məşğulluq problemi, təhsil naziri Misir Mərdanov təhsilin inkişafı ilə əlaqədar görülən işlər, məktəb tikintisi proqramı, ucqar yaşayış məntəqələrindəki məktəblərin kadr təminatı, təhsil ocaqlarının avadanlıqla təchizi problemlərini qabartmışlar.
Təhsil naziri məlumat vermişdi ki, bu gün məktəblərimizdə 7 min müəllimə ehtiyac var, 5 min müəllim öz ixtisası üzrə işləmir. Nazirlər Kabineti bu problemin həlli istiqamətində müəyyən addımlar atmışdır. Məsələn, beşillik kadr hazırlığı proqramı təsdiq edilmişdir. Ucqar dağ kəndlərində işləyənlərin maddi cəhətdən həvəsləndirilməsinə başlanmışdır və s.
Dövlət Sosial Müdafiə Fondunun sədri Səlim Müslümov, “Azərenerji” Səhmdar Cəmiyyətinin prezidenti Etibar Pirverdiyev, “Azəriqaz” Səhmdar Cəmiyyətinin sədri Əlixan Məlikov da deputatların suallarına cavab vermişlər. Qeyd olunmuşdur ki, pensiya haqqında yeni qəbul olunacaq qanunda bu sahədəki çatışmazlıqlar və ziddiyyətlər aradan qaldırılacaqdır. Əhalinin, xüsusilə ucqar dağ və sərhəd rayonları əhalisinin, Naxçıvan Muxtar Respublikasının elektrik enerjisi və qazla sabit təminatı üçün işlər davam etdirilir. Bu işlərin görülməsində büdcə vəsaitindən və beynəlxalq maliyyə qurumlarının güzəştli kreditlərindən istifadə olunur.
Bölmənin digər xəbərləri
