Gənc Müəllimlərin V Şəbəkələşmə Forumu keçirilib
Bakı, 22 dekabr, AZƏRTAC
Azərbaycan Gənc Müəllimlər Assosiasiyasının və Elm və Təhsil İşçiləri Həmkarlar İttifaqının təşkilatçılığı ilə Gənc Müəllimlərin V Şəbəkələşmə Forumu keçirilib. Forumun əsas məqsədi gənc müəllimlər arasında peşəkar ünsiyyətin gücləndirilməsi, təhsil sahəsində aktual mövzuların müzakirəsi və şəbəkələşmə imkanlarının genişləndirilməsi olub.
AZƏRTAC xəbər verir ki, Gənc Müəllimlər Assosiasiyasının sədri Pərvinə Qədimova bu cür platformaların gənc müəllimlərin peşəkar inkişafında mühüm rol oynadığını qeyd edib.
Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdiri Səbuhi Rzayev təhsil siyasətində gənc müəllimlərin yeri və onların ictimai fəallığının vacibliyini vurğulayıb.
Forumun birinci günü çərçivəsində keçirilən birinci sessiya “Gələcəyi inşa edən müəllimlər və istedadlı uşaqlarla iş” mövzusuna həsr olunub. Sessiyanın spikeri, Təhsil İnstitutunun direktor müavini Fuad Qarayev müəllimlərin gələcək nəsillərin formalaşmasındakı strateji rolundan, istedadlı şagirdlərlə işin effektiv metod və yanaşmalarından bəhs edib.
İkinci sessiya media savadlılığı mövzusunu əhatə edib. Bakı Dövlət Universitetinin Jurnalistika fakültəsinin elmi işlər üzrə dekan müavini dosent Sevinc Əliyeva “Media savadlılığı nədir və niyə vacibdir?” mövzusunda çıxış edərək informasiya cəmiyyətində tənqidi düşüncənin əhəmiyyətini diqqətə çatdırıb. Ardınca Bakı Dövlət Universitetinin Beynəlxalq jurnalistika və informasiya siyasəti kafedrasının müəllimi Nurşərəf Tağıyeva “Media savadlılığı və yeni trendlər” mövzusunda təqdimatla çıxış edib, rəqəmsal mediada baş verən yeniliklərdən danışıb.
Forumun ikinci günündə layihə idarəçiliyi və müasir texnologiyalara həsr olunmuş iki sessiya keçirilib. “Layihələrin yazılması, idarə edilməsi və maliyyə əsaslandırması” mövzusunda keçirilən birinci sessiyada Azərbaycan Gənc Müəllimlər Assosiasiyasının icraçı direktoru Aygün Kərimova layihələrin hazırlanması mərhələləri və maliyyə planlaşdırmasının əsas prinsipləri barədə ətraflı məlumat verib.
İkinci sessiya isə NAYORA-nın təşkilatlarla iş üzrə katibi Elnarə Əliyeva “Süni intellekt və rəqəmsal bacarıqlar” mövzusunda çıxış edərək təhsildə süni intellektin tətbiqi imkanları, müəllimlərin rəqəmsal bacarıqlarının inkişaf etdirilməsinin vacibliyini vurğulayıb.
İnteraktiv müzakirələr və fikir mübadiləsi ilə yadda qalan forum gənc müəllimlər üçün yeni əməkdaşlıq imkanları yaradıb. Gənc Müəllimlərin V Şəbəkələşmə Forumu uğurla yekunlaşıb.
Bölmənin digər xəbərləri
