Gəncə-Kəlbəcər-Laçın yolunun 16,5 kilometrlik hissəsi yenidən qurulur VİDEO
Bakı, 7 avqust, AZƏRTAC
Gəncə-Kəlbəcər-Laçın yolunun 16,5 kilometrlik hissəsi yenidən qurulur.
Azərbaycan Avtomobil Yolları Dövlət Agentliyindən AZƏRTAC-a bildirilib ki, Gəncə-Kəlbəcər-Laçın avtomobil yolunun 38,4 metrlik Gəncə-Göygöl hissəsinin yenidən qurulması iki mərhələ üzrə həyata keçirilir. Birinci mərhələ üzrə sözügedən yolun 16,5 kilometrlik Gəncə-Yeni Zod hissəsi yenidən qurulur. İkinci mərhələ üzrə isə Yeni Zod-Göygöl hissəsinin yenidən qurulması işlərinə başlanılacaq. Birinci mərhələ üzrə yolun 16,5 kilometrlik Gəncə-Yeni Zod hissəsində yenidənqurma işləri artıq yekunlaşmaq üzrədir.
Gəncə-Kəlbəcər-Laçın avtomobil yolunun III texniki dərəcəyə uyğun yenidən qurulması işləri aparılır. Layihəyə uyğun olaraq köhnə asfalt-beton örtüyü 12 min kubmetr həcmində sökülüb, sökülmüş hissələrdə, həmçinin zəruri digər ərazilərdə 146 min kubmetr həcmdə torpaq işləri görülür, yeni yol yatağı inşa olunur. Bunun ardınca qum-çınqıl qarışığından 20 santimetr qalınlıqda əsasın alt layı, optimal-çınqıl qarışığından isə 16 santimetr qalınlıqda əsasın üst layının inşası işləri aparılır. Bu işlər 245 min kvadratmetr sahəni əhatə edir.
Yol əsası hazır olan hissələrdə artıq asfaltlanma işləri görülür. Əlaqələndirici bitum səpilməklə 13 santimetr qalınlıqda iri dənəli asfalt-beton qarışığından örtüyün alt layı, 5 santimetr hündürlükdə isə xırda dənəli asfalt-beton qarışığından əsasın üst layı döşənir. Asfaltlanma işləri ümumilikdə yolun 135 min kvadratmetr sahəsini əhatə edir. Asfaltlanan ərazilərdə 71 min kvadratmetr sahədə çiyin hissələr 18 santimetr qalınlıqda optimal-çınqıl qarışığı ilə bərkidilir, 25 nöqtədə yol birləşmələri təmir edilir.
Tikinti norma və qaydalarına uyğun olaraq, yolboyu suların ötürülməsi üçün müxtəlif diametrli və 65 poqonmetr uzunluğunda olan boruların təmiri və tikilməsi işləri aparılıb, zəruri olan yerlərdə 6150 kvadratmetr sahədə istinad divarları inşa edilib, 2,1 kilometr uzunluğunda küvet hissələr, həmçinin təhlükəli ərazilərdə 5350 metr uzunluğunda dəmir-beton tumbalar tikilib.
Vətəndaşların yol kənarı ilə rahat və təhlükəsiz hərəkətini təmin etmək məqsədilə zəruri olan yerlərdə 5,7 kilometr uzunluğunda yeni piyada səkiləri inşa edilir, kənarlarına səki daşları düzülür.
Tikinti layihəsinin sonuncu mərhələsində hərəkətin normal təşkili üçün yolboyu 2 ədəd transformator və 320 ədəd işıq dirəyi, 974 ədəd siqnal dirəyi, 170 ədəd yol nişanı və təhlükəli ərazilərdə 3,3 kilometr uzunluğunda əyri-xətli dəmir tirlər quraşdırılacaq, 50 kilometr uzunluğunda üfüqi nişanlanma xətləri çəkiləcək.
Respublika əhəmiyyətli Gəncə-Kəlbəcər-Laçın avtomobil yolunun 16,5 kilometrlik Gəncə-Yeni Zod hissəsində yenidənqurma işlərinin yaxın müddət ərzində yekunlaşdırılması nəzərdə tutulub. Növbəti mərhələdə sözügedən yolun 21,9 kilometr uzunluğa malik Yeni Zod-Göygöl hissəsinin yenidən qurulması işlərinə başlanılacaq.
Bölmənin digər xəbərləri
