Gəncədə “Dövlət suverenliyi və milli birliyin qorunmasının ideoloji əsasları” mövzusunda tədbir keçirilib
Bakı, 27 oktyabr, AZƏRTAC
“Suverenlik və Konstitusiya İli” çərçivəsində Gəncə Şəhər İcra Hakimiyyəti, YAP Gəncə şəhər təşkilatı və Bakı Politoloqlar Klubunun təşkilatçılığı və tərəfdaşlığı ilə “Dövlət suverenliyi və milli birliyin qorunmasının ideoloji əsasları” mövzusunda tədbir keçirilib.
Bu barədə AZƏRTAC-a Bakı Politoloqlar Klubundan məlumat verilib.
Açılış mərasimində çıxış edən YAP Gəncə şəhər təşkilatının sədri Bayram Aslanov vurğulayıb ki, qlobal informasiya müharibələrinin, ideoloji təxribatların və hibrid təhlükələrin artdığı bir dövrdə bu kimi maarifləndirmə tədbirlərinin keçirilməsi önəmlidir. Ulu Öndər Heydər Əliyevin yaratdığı milli dövlətçilik ideologiyası Prezident İlham Əliyevin rəhbərliyi ilə yeni mərhələyə yüksəlib, milli birliyin möhkəmləndirilməsi istiqamətində ardıcıl siyasət həyata keçirilir. Belə maarifləndirici tədbirlərin, xüsusilə də Gəncə kimi tarixi bölgələrdə keçirilməsi cəmiyyətin bütün təbəqələrində ideoloji həmrəyliyin güclənməsinə xidmət edir.
Milli Məclisin deputatı Pərvin Kərimzadə milli birliyin qorunmasının vacib şərti olan informasiya təhlükəsizliyinin təmin olunmasından, milli dəyərlərin təbliğinin əhəmiyyətindən söz açıb. O qeyd edib ki, müasir dünyada ideoloji mübarizə artıq sosial şəbəkələr və media vasitəsilə aparılır, dezinformasiya kampaniyaları dövlətlərin suverenliyinə birbaşa təsir göstərir. Bu səbəbdən də Azərbaycanın informasiya məkanının müdafiəsi, milli dəyərlərin təbliği və gənclərin milli düşüncə ilə formalaşması strateji əhəmiyyət kəsb edir. Deputat, həmçinin qeyd edib ki, ali təhsil müəssisələri, ziyalılar və ictimai təsisatlar bu prosesdə xüsusi rol oynayır. Onların əsas vəzifəsi gənclərin təkcə peşəkar biliklərə deyil, həm də vətənpərvərlik, dövlətçilik və milli məsuliyyət hissinə sahib vətəndaşlar kimi yetişdirilməsinə xidmət etməkdir. Azərbaycanın gücü onun milli birliyində və dövlətinə sarsılmaz inamındadir. Hər bir gənc bu inamı şəxsi həyat fəlsəfəsinə çevirməli, milli kimlik və dəyərlərin qorunması istiqamətində fəal mövqe tutmalıdır.
Bakı Politoloqlar Klubunun sədri Zaur Məmmədov müasir dövrün çağırışları fonunda milli birliyin vacib amil olduğunu və bu kimi tədbirlərin həmsərhəd bölgələrdə keçirilməsinin siyasi – ideoloji tərəflərinə toxunub. O, Ulu Öndər Heydər Əliyev tərəfindən əsası qoyulan və Prezident İlham Əliyev tərəfindən davam etdirilən ideoloji siyasətin əsas istiqamətlərindən bəhs edərək ölkəmizin bu gün dünyada vacib yer tutduğunu xüsusi vurğulayıb. Zaur Məmmədov mədəni assimilyasiya təhlükələri, rəqəmsal əsrdə milli kimliyin qorunması, qarşıda duran çağırışlar və Azərbaycana qarşı ideoloji müharibə mövzularında geniş fikir mübadiləsi aparıb. O, gənclərin diqqət yetirməli olduqları məqamları ön plana çəkib, vətəndaş-dövlət həmrəyliyi kimi dəyərlərin qlobal informasiya mühitində qorunmasının strateji əhəmiyyət kəsb etdiyini bildirib.
Dini Qurumlarla İş Üzrə Dövlət Komitəsinin Gəncə bölgəsi üzrə şöbəsinin müdiri Həsən Məmmədov çıxışında dövlət və din münasibətlərinə toxunaraq müxtəlif xarici qüvvələrin ölkə daxilində dini zəmində cəmiyyət daxilində nifaq salmaq cəhdlərindən danışıb, gənclərin diqqət yetirməli olduqları məsələləri xüsusilə qeyd edib. O bildirib ki, dövlətin həyata keçirdiyi siyasət nəticəsində ölkədə tolerantlıq və multikultural dəyərlər sistemi möhkəmlənib, milli həmrəyliyə qarşı yönələn bütün cəhdlər iflasa uğrayıb və bundan sonra da iflasa uğrayacaq.
Bölmənin digər xəbərləri
