GƏNCƏDƏ REGİONLARIN SOSİAL-İQTİSADİ İNKİŞAFININ NƏZƏRİ VƏ PRAKTİKİ MƏSƏLƏLƏRİNƏ HƏSR OLUNMUŞ KONFRANS KEÇİRİLMİŞDİR
Gəncədə Təhsil Nazirliyi, Gəncə Şəhər İcra Hakimiyyəti və Gəncə Dövlət Universiteti “Regionların sosial-iqtisadi ihkişafının nəzəri və praktiki məsələləri” mövzusunda birgə elmi-praktiki konfrans keçirmişlər.
Respublikamızın qərb bölgəsi rayonları nümayəndələrinin də qatıldıqları konfransın əvvəlində Gəncə Dövlət Universitetinin rektoru, professor Elman Məmmədov Prezident İlham Əliyevin 2004-cü ildə imzaladığı regionların sosial-iqtisadi inkişafı dair Dövlət Proqramının əhəmiyyətindən danışmış, proqram çərçivəsində respublikamızda infrastrukturun tamamilə yenidən qurulması istiqamətində görülən işləri tədbir iştirakçılarının nəzərinə çatdırmışdır.
Gəncə Şəhər İcra Hakimiyyəti başçısının birinci müavini Rövşən Sadıqov 4 il ərzində regionların sosial-iqtisadi inkişafı Dövlət Proqramı çərçivəsində Gəncədə görülən işlərdən danışmışdır.
Samux və Ağstafa rayonları nümayəndələrinin təmsil etdikləri rayonlarda görülən işlərlə bağlı məlumatları dinlədikdən sonra konfrans öz işini bölmə iclaslarında davam etdirmişdir. Bölmə iclaslarında 30-dək məruzə dinlənilmiş və məruzələr ətrafında geniş müzakirələr aparılmışdır.
Maraqlı fikir mübadiləsi şəraitində keçən konfransda əsasən regionların sosial-iqtisadi inkişafı Dövlət proqramının yerinə yetirilməsinin konkret nəticələri müzakirə edilmişdir. Həmçinin ölkənin qərb regionunda sənayenin və kənd təsərrüfatının inkişafı yolları və bölgədə bank və kredit siyasəti-sərmayə qoyuluşu imkanları genış təhlil edilmiş, iqtisadi elmlərin təsir etdiyi və yaxud tətbiq olunduğu sahələrdə əldə olunmuş elmi nailiyyətlər barədə məlumatlar dinlənilmiş, sosial-iqtisadi məsələlər araşdırılmış, problemlərin həlli yolları barədə elmi təhlillər verilmişdir.
Məruzə və çıxışlar kitab şəklində çap ediləcəkədir.
