GƏNCƏDƏ ZONA MÜŞAVİRƏSİ KEÇİRİLMİŞDİR
“Azəriqaz” Səhmdar Cəmiyyəti Gəncədə zona müşavirəsi keçirmişdir. Respublikanın qərb regionu üzrə 6 rayonun qaz-istismar idarələri rəhbərləri və mütəxəssislərinin iştirakı ilə keçirilən müşavirədə “Azəriqaz” Səhmdar Cəmiyyətinin prezidenti Əlixan Məlikovun 2005-ci ildə görülən işlərə və 2006-cı ildə əhalinin qaz təchizatında qarşıda duran vəzifələrə dair məlumatı dinlənilmişdir. Qeyd edilmişdir ki, bəzi nöqsan və çatışmazlıqlara baxmayaraq, keçən il ölkə əhalisinin mavi yanacaqla təminatında elə bir ciddi problem olmamış, bölgələrdə əhalinin qaza olan tələbatının ödənilməsi ilə bağlı ölkə başçısının qarşıya qoyduğu tələblərin həlli istiqamətində bir sıra məqsədyönlü işlər həyata keçirilmişdir. Ölkəmizdə qaz hasilatının yüksəlməsi nəticəsində yeraltı qaz anbarlarına vurulan mavi yanacağın əvvəlki illərə nisbətən artması bir çox bölgələrə qazın nəqlini bərpa etməyə imkan vermişdir. İşlədilən mavi yanacağın pulunun ödənilməsində yaranan problemləri aradan qaldırmaq məqsədi ilə təkcə ötən il mənzillərdə 240 minə yaxın sayğac quraşdırılmışdır. Cari ildə isə daha 500 min sayğacın quraşdırılması nəzərdə tutulmuşdur və bu iş hazırda uğurla davam etdirilir.
Əhalinin qaz təminatında yaranan bəzi nöqsanlardan danışan Əlixan Məlikov problemlərin təcili olaraq aradan qaldırılması üçün rayon qaz-istismar idarələri rəhbərlərinə ciddi tapşırıqlar vermişdir. Sonra ayrı-ayrı idarə rəhbərlərinin məlumatları dinlənilmişdir.
Müşavirədən sonra iştirakçılar şəhərin mərkəzinə gələrək, ümummilli lider Heydər Əliyevin abidəsini ziyarət etmiş və önünə gül-çiçək dəstələri qoymuşlar.
Bölmənin digər xəbərləri
