GƏNCLƏR GÜNÜ MÜNASİBƏTİLƏ BOKS ÜZRƏ SUMQAYIT BİRİNCİLİYİ KEÇİRİLİR
AZƏRTAC-ın müxbiri xəbər verir ki, Sumqayıtda Gənclər günü münasibətilə boks üzrə şəhər birinciliyi başlanmışdır. Yarışlar şəhər Gənclər və İdman İdarəsinin Gənclər gününün təsis olunmasının 10 illiyi ilə əlaqədar tərtib etdiyi xüsusi proqram çərçivəsində keçirilir.
1 nömrəli uşaq-gənclər idman məktəbində keçirilən turnirdə idman məktəblərini, cəmiyyət və klublarını təmsil edən 60-dan çox idmançı mübarizə aparır. Qaliblərə Sumqayıt Gənclər və İdman İdarəsinin fəxri fərmanları və hədiyyələri veriləcəkdir.
İdarənin rəisi Musa Həsənovun sözlərinə görə, Sumqayıtda idmanla məşğul olmaq üçün yaxşı şərait yaradılmışdır. Az vaxt ərzində şəhərin yaşayış massivlərində 50-dən çox idman meydançası tikilmişdir. Uşaq idman məktəbləri mərhələlərlə təmir edilir, onların maddi-texniki bazası möhkəmləndirilmişdir.
M.Həsənovun sözlərinə görə, uşaq-gənclər idman məktəblərində fəaliyyət göstərən 53 qrupda 600-ə yaxın adam boksla məşğul olur. Məşqləri 22 idman ustası aparır ki, onların arasında respublikanın əməkdar məşqçiləri də var.
Afina Olimpiya oyunlarının bürünc mükafatçısı Fuad Aslanov, ötənilki Avropa çempionatının gümüş medalçısı Şahin İmanov, dünya kubokunun komanda hesabında üçüncü yeri tutmuş Turab Məmmədov və başqaları respublikada boksun inkişafı tarixinin şanlı səhifəsini yazmışlar.
Bölmənin digər xəbərləri
