“GENERAL ŞIXLİNSKİ” TANKERİNDƏ İTKİN DÜŞƏNLƏRİN CƏSƏDLƏRİ TAPILMIŞDIR
Azərbaycan Dövlət Xəzər Dəniz Gəmiçiliyinin mətbuat xidmətindən AZƏRTAC-a bildirmişlər ki, iyulun 15-də tankerin maşın bölməsi yoxlanılarkən qəza zamanı itkin düşmüş 6 nəfər heyət üzvünün - kapitan Bəhlul Məhərrəmovun, böyük mexanik Tapdıq Güliyevin, ikinci mexanik Abdulla Əhmədovun, üçüncü mexanik Asif Qaraşovun, motorçu Əkrəm Həsənovun, tornaçı-motorçu Azər Rzayevin yanmış cəsədləri aşkar edilmişdir.
Həlak olmuş heyət üzvlərinin dəfnini təşkil etmək məqsədi ilə Dövlət Xəzər Dəniz Gəmiçiliyində komissiya yaradılmışdır.
Elə həmin gün “Professor Gül” gəmi-bərəsində meyitlərin ekspertizası başa çatdırıldıqdan sonra mərhumların cənazələri Bakıya göndərilmişdir. İyulun 16-da yerli vaxtla saat 16-da gəmi Bakı limanına gəlmişdir.
Gəmi-bərə ilə tanker heyətinin üç nəfər üzvü - matros-motorçular Cəmiyyət İsmayılov, Gülağa Zülfüqarov və matros Elman Vəlixanov Bakıya qayıtmışlar.
“General Şıxlinski” tankerinin 5 nəfər heyət üzvü - gəmi kapitanının böyük köməkçisi Eldar Məmmədov, elektromexanik Zahid Vahidov, kapitanın ikinci köməkçisi Nail Fərəcov, bufetçi Qalina Lupakova və dokerman-matros Rauf İmaməliyev Türkmənbaşı limanında öz işlərini davam etdirirlər.
Təhqiqat işləri başa çatdıqdan sonra gəmi heyətinin qalan üzvləri də vətənə dönəcəklər. “General Şıxlinski” tankeri yedəyə alınaraq Bakıya gətiriləcəkdir.
Bölmənin digər xəbərləri
