CƏMİYYƏT
“GENERAL ŞIXLİNSKİ” TANKERİNDƏ TƏHQIQAT İŞLƏRİ YAXIN İKİ-ÜÇ GÜNDƏ BAŞA ÇATACAQDIR
“General Şıxlinski” tankerində baş vermiş qəza ilə bağlı son vəziyyəti öyrənmək məqsədi ilə AZƏRTAC-ın müxbiri iyulun 10-da Azərbaycan Dövlət Xəzər Dəniz Gəmiçiliyində olmuş, Türkmənbaşı limanında xilasetmə işlərinə başçılıq edən komissiyasının sədri, Gəmiçiliyin rəisinin birinci müavini Rəfael Rəhmanovla telefon əlaqəsi saxlamışdır.
R.Rəhmanov demişdir: Xəbər verdiyimiz kimi, gəmidə yanğın tamamilə söndürülmüşdür. İndi komissiya gəminin yük anbarlarının, əsas qovşaq və hissələrinin vəziyyətini nəzərdən keçirir. İyulun 10-da dalğıclar gəminin gövdəsini diqqətlə yoxlamışlar. Gəminin gövdəsi salamatdır, heç bir zədə yoxdur. Yanğın söndürülərkən gəminin yük anbarlarına dolmuş suyun nasoslar vasitəsilə başqa gəmiyə vurulması davam edir. İyulun 9-da Bakıdan göndərilmiş hüquq mühafizə orqanlarının nümayəndələri də komissiya ilə birlikdə təhqiqata başlamışlar. Yaxın iki-üç gün içərisində təhqiqat işləri başa çatdırılacaq və gəmi yedəyə götürülərək Bakı limanına gətiriləcəkdir. Bakıdan hərəsində 3 dalğıc olan iki qrup hadisə yerinə dəvət edilmişdir. İyulun 10-da onlar itkin düşmüş dənizçilərin axtarışı ilə məşğul olmağa başlamışlar.
Komissiyanın sədri daha sonra bildirmişdir ki, Türkmənbaşıda olan gəmi heyəti üzvlərinin öz əzizləri və yaxınları ilə əlaqə saxlaması üçün daimi fəaliyyət göstərən qərargahda telefon rabitəsi yaradılmışdır. Gəmiçilikdə isə heyət üzvlərinin qohumları ilə görüş keçirilmiş, onlara müvafiq məlumat verilmişdir. Heyət üzvlərinin qohumları və yaxınlarının suallarına 93-54-00 nömrəli telefonla cavab verilir. Lakin müxalifətin bəzi kütləvi informasiya vasitələrində yanlış məlumatların verilməsi həm bizdə, həm də dənizçilərin ailələrində narahatçılıq, nigarançılıq doğurur. Gəmi kapitanının baş köməkçisi Eldar Ağahüseyn oğlu Məmmədovun həlak olması barədə məlumatla əlaqədar onu demək istəyirəm ki, o, burada, mənim yanımdadır və sizinlə telefonla danışa bilər. O ki qaldı 6 dənizçinin itkin düşməsinə, onların axtarışı davam edir. Hansısa yenilik olan kimi, kütləvi informasiya vasitələrinə məlumat veriləcəkdir.