GÖMRÜKÇÜLƏR TEXNİKİ AVADANLIQ ALMIŞLAR
Baki Beynəlxalq Dəniz Limanının mühafizəsi ilə bağlı Avropa Birliyi ekspertlərinin tövsiyələrinə əsasən, SKAD proqramı çərçivəsində Azərbaycana xüsusi endoskoplar, rentgen texnikası cihazları və “Mersedes” markalı avtomaşın gətirilmişdir.
İyulun 18-də Dövlət Gömrük Komitəsində Avropa Birliyi və BMT-nin İnkişaf Proqramı nümayəndələri tərəfindən texniki avadanlıqların komitənin sədri Kəmaləddin Heydərova təqdim olunması mərasimi keçirilmişdir. Mərasimi giriş sözü ilə baş nazirin müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komitəsinin sədri Əli Həsənov açdı.
“Cənubi Qafqazda narkotiklərə nəzarət” (SKAD) regional proqramının milli əlaqələndiricisi Məzahir Əfəndiyev proqramın həyata keçirilməsi barədə məlumat verərək dedi ki, ötən il ərzində respublikamızın müvafiq strukturları lazımi avadanlıqla və metodoloji vəsaitlə təmin edilmişdir.
BMT-nin rezident-əlaqələndiricisi, BMT-nin İnkişaf Proqramının Azərbaycandakı nümayəndəsi Marko Borsotti, Yunanıstanın ölkəmizdəki səfiri Merkurios Karafotias çıxışlarında Avropa Birliyi və BMT-nin İnkişaf Proqramının ölkəmizin hökumət qurumları ilə sıx əməkdaşlığından məmnun olduqlarını bildirdilər.
Qeyd olundu ki, yerli mütəxəssisləri avadanlığı quraşdırmağa və ondan istifadə etməyə öyrətmək məqsədi ilə xarici ekspertlər tərəfindən treninq kursları da keçirilmişdir.
Bölmənin digər xəbərləri
