GÜCLÜ LEYSAN ŞƏKİNİN TƏSƏRRÜFATLARINA CİDDİ ZİYAN VURMUŞDUR
İyulun 3-də saat 22.00 radələrində baş vermiş təbii fəlakət - güclü leysan nəticəsində Şəki şəhərində və rayonun bir-sıra yaşayış məntəqələrində vətəndaşların şəxsi təsərrüfatlarına, sosial obyektlərə ciddi ziyan dəymişdir.
Şəki fövqəladə hallar komissiyası sədrinin müavini Valeh Ələkbərov AZƏRTAC-ın müxbirinə bildirmişdir ki, güclü leysan yağışları nəticəsində rayon ərazisindən qısamüddətli sel keçmiş, nəticədə yolların asfalt örtüyü sıradan çıxmış, sosial obyektlərin, ictimai binaların, fərdi yaşayış evlərinin birinci mərtəbələrini, zirzəmiləri su basmışdır. Ağacların və elektrik dirəklərinin aşması nəticəsində şəhərin və kəndlərin elektrik enerjisi ilə təchizatında fasilələr yaranmışdır. Leysan rayonun kənd təsərrüfatına da ciddi ziyan vurmuş, əkin sahələrini, bəzi yerlərdə taxıl əkinlərini su basmış, xeyli kənd təsərrüfatı məhsulu sıradan çıxmış, qoyun-quzu tələf olmuşdur.
Hazırda şəhər icra hakimiyyəti əlaqədar strukturlarla birgə təbii fəlakətin nəticələrinin aradan qaldırılması üçün operativ tədbirlər həyata keçirir. Artıq magistral və daxili yollar, küçələr qum-çınqıldan təmizlənmiş, yaşayış məntəqələrinə elektrik enerjisinin verilməsi bərpa olunmuşdur.
Bölmənin digər xəbərləri
