GÜLƏŞ ÜZRƏ RESPUBLİKA SEMİNARI BAŞA ÇATMIŞDIR
Bakı, 24 dekabr (AZƏRTAC). Azərbaycan Dövlət Bədən Tərbiyəsi və İdman Akademiyasının (ADBTİA) akt zalında sərbəst və yunan-Roma güləşi üzrə respublika seminarı keçirilmişdir.
Gənclər və İdman Nazirliyi, Azərbaycan Güləş Federasiyası və Azərbaycan Dövlət Bədən Tərbiyəsi və İdman Akademiyasının “Güləş və onun metodikası” kafedrasının birgə təşkilatçılığı ilə keçirilmiş tədbirdə 200-ə yaxın məşqçi və hakim iştirak etmişdir.
Seminar nəzəri və təcrübi məşğələlərdən ibarət olmuşdur. Məşğələlərdə məşqçi və hakimlərlə aktual mövzular ətrafında müzakirələr aparılmış, onlara müəyyən tövsiyələr verilmişdir. Əsas fikir mübadiləsi güləşçilərin gigiyena və idman təbabətinin rolu, idmanda dopinq və farmakoloji təminat, eləcə də məşqçilər, hakimlər və güləşçilərin etik qaydalara riayətetmə məsələləri ətrafında olmuşdur.
Qeyd edək ki, nəzəri və sərbəst güləş üzrə təcrübi məşğələlər ADBTİA-nın akt zalında, yunan-Roma güləşi üzrə təcrübi məşğələlər isə Tofiq Bəhramov adına Respublika stadionunun güləş zalında təşkil edilmişdir.
Bölmənin digər xəbərləri
