GÜRCÜSTAN PREZİDENTİ MİXAİL SAAKAŞVİLİNİN BƏYANATI
Düşünürəm ki, bütün maneələrə baxmayaraq, ölkələrimiz çox dinamik inkişaf edir, maraqlı çox hadisələr baş verir. GUAM-ın üzvü olan ölkələrin beynəlxalq nüfuzu, təsiri son vaxtlar ciddi şəkildə artmış və möhkəmlənmişdir.
İqtisadiyyatımız inkişaf edir. Məsələn, birlikdə götürdükdə, bu il biz Gürcüstanda son 15 ildəkindən daha çox xəstəxana, məktəb, yollar, digər infrastruktur obyektləri tikirik. Qonşumuz Azərbaycanda, GUAM-ın üzvü olan digər ölkələrdə də bu cür proseslər gedir. Təbii ki, bu, yeni qurumlarla möhkəmləndirilməlidir. Çox mühümdür ki, Ukraynaya, Gürcüstana, Moldovaya qarşı iqtisadi sanksiyaların real şəkildə elan olunduğu bir dövrdə, yeni qadağalar və maneələr dövründə biz ölkələrimiz arasında azad ticarət rejimi tətbiq edilməsinə razılıq verdik. Bu, bütün ölkələrə, bütün vətəndaşlara, bütün istehsalçılara, bütün ixracçılara və idxalçılara sərfəlidir. Düşünürəm ki, bütün bunlar tam konkret nəticəsini verəcəkdir.
Biz beynəlxalq kriminalla, onun yerdəyişmələri, əlaqələri ilə birlikdə mübarizə aparmaq barədə razılığa gəldik. Bunu xatırlamaq kifayətdir ki, Gürcüstan həbsxanalarında bu yaxınlarda baş verən iğtişaşları Ukraynada məskən salmış və burada yerli hakimiyyət orqanları tərəfindən tutulmuş gürcü kriminal ünsürləri təşkil etmişdilər. Ölkələrimiz arasında yaxşı əlaqə yaradılmışdır. Təəssüf ki, heç də bütün ölkələr bu işdə yaxşı iştirak etmirlər. Mən elə ölkə tanıyıram ki, orada hər hansı gürcü kriminal nüfuz sahibi özünü azad-asudə hiss edir, necə ki, XVIII əsrdə amerikalı kriminal şəxslər Kanadaya asanlıqla gedirdilər. Lakin orada hər şey dəyişmişdir. Lakin həmin ölkəyə isə təkcə gürcü kriminalları deyil, ukraynalı və digər kriminallar da gedir və təəssüf ki, orada özlərinə sığınacaq tapa bilirlər.
Lakin biz əməkdaşlıq aparacaq və bu məsələləri həll edəcəyik. Siyasi sahədə əməkdaşlıq etdiyimiz kimi, kriminalla, separatizmlə də mübarizə aparacağımızı bildiririk. Düşünürəm ki, Ukrayna Dnestryanı bölgə ilə sərhəddə xüsusi nəzarət tətbiq olunması haqqında Moldova ilə razılığa gəldikdə, Ukrayna Prezidenti qeyri-adi siyasi cəsarət və dövləti mövqe nümayiş etdirdi. Zənnimcə, bu, həmin məsələnin həllinin rəhnidir, üstəlik, hamımıza ümid verir və belə vəziyyətdə necə hərəkət etməyin vacibliyi barədə digərlərinə nümunə göstərir. Həqiqətən, ilk nəticə, məncə, göz qabağındadır və Dnestryanı bölgə probleminin nizama salınması prosesi “ölü nöqtə”dən çıxıb irəliləməyə başlayır və bu, hamımıza ümid verir.
Biz mürəkkəb vəziyyətdə bir-birinə neçə kömək etmək nümunələri nümayiş etdirdik - Ukrayna öz elektrik enerjisini Moldova ilə bölüşdü, Gürcüstanın enerji sistemlərinə qarşı sabotaj edildikdə Azərbaycan rəhbərliyi qışın çox soyuq günlərində daxili istehlakçılara verilən qazın azaldılması haqqında qərar çıxararaq, qazın bir hissəsini Gürcüstan əhalisi ilə bölüşdü. İnsanlar belə yaxşılıqları heç vaxt unutmurlar, onlar bunu uzun müddət xatırlayacaqlar, ağır gündə kimin bizə kömək əlini uzatdığını, kimlərinsə, təəssüflər olsun, problemlər yaratdığını yadda saxlayacaqlar. Bunlar sanki tək-tək misallardır, ancaq problemlərimizi qat-qat asanlıqla həll etməyə və aradan qaldırmağa imkan verən sistem formalaşdırır.
Mənimlə Ukrayna Prezidentinin imzaladığı Karpat bəyannaməsi, Borjomi bəyannaməsi demokratik əməkdaşlıq ölkələrinin Kiyev görüşü ilə nəticələndi, bu isə öz növbəsində Vilnüs görüşünə gətirib çıxardı. Bu, həqiqətən, tarixi prosesdir. Bir neçə həftə əvvəl Vilnüsdə, həqiqətən, tarixi bəyanatlar verildi və bu, Avropanın yeni xəritəsinin, Avropa qitəsində, regionumuzda yeni reallıqların formalaşmasında bir növ dönüş məqamı idi.
Belə görüşlər ona gətirib çıxarır ki, ölkələrimiz demokratik, inkişaf etmiş, sivilizasiyalı dünyanın, sivilizasiyalı münasibətlərin həmişəlik bir hissəsinə çevrilir. Nə kimi çətinliklər olsa da, - onlar, şübhəsiz, var və olacaq, - bu yol dönməzdir və mütləq uğurla başa çatacaqdır.
Bu mənada biz bu gün baş verənləri alqışlayırıq. Rəmzi haldır ki, bu, Kiyevdə Ukrayna üçün çox gözəl vaxtda baş verir, indi nəinki şabalıd ağacları gül açmışdır, həm də yeni münasibətlər yaranmışdır və onlar mütləq çiçəklənəcək və uğurlu olacaqdır. Biz Ukraynanın təşəbbüsünü və liderliyini alqışlayırıq, həmçinin başa düşürük ki, ölkələrimizin hər biri öz töhfəsini verməli və özünü maksimum göstərə biləcəyi sahədə lider olmalıdır.
Mən həm də şadam ki, buraya digər dost ölkələrin - Rumıniyanın, Bolqarıstanın, ABŞ-ın, habelə ATƏT-in, Qara Dəniz İqtisadi Əməkdaşlıq Təşkilatının nümayəndələri də gəlmişlər. Düşünürəm ki, bu gün baş verənlər hamımız üçün böyük yolun başlanğıcıdır.
Təşəkkür edirəm.
Bölmənin digər xəbərləri
