GÜRCÜSTANDA VƏ QAFQAZDA VƏZİYYƏT RUSİYA- AMERİKA SAMMİTİNDƏ MÜZAKİRƏ OLUNA BİLƏR
ABŞ-ın Rusiya Federasiyasındakı səfiri Aleksandr Verşbou Gürcüstanda və Qafqazda vəziyyətin Moskvada Rusiya-Amerika sammitində prezidentlər Vladimir Putin və Corc Buş tərəfindən müzakirə olunacağını istisna etməmişdir. Bunu o, jurnalistlərə Rusiya paytaxtında bəyan etmişdir.
Verşbounun fikrincə, “indi Rusiya tərəft ABŞ-ın Gürcüstandakı fəaliyyətini daha yaxşı başa düşür”. Səfir “Amerika layihəsinin terrorizmlə daha yaxşı mübarizə aparmaq üçün Gürcüstan silahlı qüvvələri ilə təlim keçməkdən ibarət olduğunu” xatırladaraq, “Amerika tərəfinin anlaşılmazlığa yol verməmək üçün öz fəaliyyətini rusiyalı həmkarları ilə daha sıx surətdə əlaqələndirməyə” hazır olduğunu vurğulamışdır.
İTAR-TASS-ın verdiyi xəbərə görə, A.Verşbou may ayında Vladimir Putin ilə Corc Buşun görüşündə Dağlıq Qarabağda vəziyyətin müzakirə olunacağını da istisna etməmişdir. Səfir demişdir: “Hər iki prezident indi bu problemin həllinə dair çox ciddi danışıqlar aparmağa cəhd göstərir”.
Bölmənin digər xəbərləri
