Gürcüstandakı azərbaycanlı şagirdlər üçün məntiqlə bağlı onlayn tədris bərpa olunub
Bakı, 18 may, AZƏRTAC
Gürcüstandakı azərbaycanlı şagirdlər üçün məntiqlə bağlı onlayn tədris bərpa olunub.
Diasporla İş üzrə Dövlət Komitəsindən AZƏRTAC-a bildiriblər ki, bu barədə Komitənin təşəbbüsü ilə Gürcüstan Azərbaycanlılarının İnteqrasiya Mərkəzi (GAİM) ilə təşkil edilən videokonfransda məlumat verilib. Tədbir “COVID-19 pandemiyası ilə əlaqədar yaranan çətinliklər, həll yolları və gələcək perspektivlər” mövzusuna həsr olunub.
Müzakirələr zamanı Gürcüstandakı mövcud durum, təhsil və tədrisdə yaranan problemlər, onlayn tədris imkanları barədə fikir mübadiləsi aparılıb. Fövqəladə vəziyyətin bitməsindən və karantin rejiminin aradan qaldırılmasından sonra GAİM-də sosial məsafə qaydasına əməl olunmaqla tədrisin bərpa edilməsinin vacibliyi vurğulanıb. Ali məktəblərə qəbul imtahanlarına hazırlaşan abituriyentlərə dəstək məqsədilə məntiq fənnindən onlayn tədrisin bərpa olunduğu bildirilib.
Xatırladaq ki, GAİM 2019-cu il aprelin 3-dən Diasporla İş üzrə Dövlət Komitəsinin dəstəyi ilə Gürcüstanın Marneuli rayonunda fəaliyyətə başlayıb. Ötən il mərkəzin 16 dinləyicisi “1+4” proqramı üzrə Gürcüstanın ali məktəblərinə qəbul olunublar.
Bölmənin digər xəbərləri
