Hava şəraitinin yağmursuz keçməsi ilə əlaqədar olaraq çaylarda sululuq azalıb
Bakı, 19 aprel, AZƏRTAC
Son günlər havaların yağmursuz keçməsi nəticəsində çaylarda, o cümlədən Kür çayına tökülən çaylarda sululuğun azalması müşahidə olunub.
AZƏRTAC xəbər verir ki, bunu Milli Hidrometeorologiya Xidmətinin Hidrologiya Mərkəzinin direktoru Asif Verdiyev bildirib.
Onun sözlərinə görə, Kür çayının yuxarı axınında - Qıraqkəsəmən məntəqəsində aprelin 6-dan başlayaraq suyun səviyyəsi 97 santimetr azalıb. Hazırda su sərfi 365 kubmetr/saniyə olmaqla normanın 49 faizini təşkil edir ki, bu da keçən il ilə müqayisədə 6 faiz azdır: “Qanıx çayının Cəlayir məntəqəsində suyun səviyyəsi 106 santimetr azalıb. Hazırda su sərfi saniyədə 88,5 kubmetr olmaqla normanın 53 faizinə bərabərdir. Bu da keçən il ilə müqayisədə 16 faiz azdır. Kür çayının aşağı axınında - Yevlax məntəqəsində suyun səviyyəsində ciddi dəyişiklik olmayıb. Hazırda su sərfi 122 kubmetr/saniyə olmaqla normanın 45 faizini təşkil edir ki, bu da keçən ilin göstəricisinə yaxındır. Kür-Zərdab məntəqəsində aprelin 15-dən başlayaraq suyun səviyyəsi 61 santimetr azalıb. Hazırda su sərfi 103 kubmetr/saniyə olmaqla normanın 33 faizini təşkil edir ki, bu da keçən il ilə müqayisədə 19 faiz azdır. Kür-Surra məntəqəsində aprelin 14-dən başlayaraq suyun səviyyəsi 35 santimetr azalıb, hazırda su sərfi 90 kubmetr/saniyə olmaqla normanın 12 faizini təşkil edir ki, bu da keçən ilin göstəricisinə yaxındır. Kür-Şirvan məntəqəsində aprelin 15-dən başlayaraq suyun səviyyəsi 10 santimetr azalıb. Hazırda suyun səviyyəsi 129 santimetr olmaqla keçən il ilə müqayisədə 12 santimetr çoxdur. Kür-Salyan məntəqəsində aprelin 17-dən suyun səviyyəsi 25 santimetr azalıb. Hazırda suyun səviyyəsi 358 santimetr olmaqla keçən il ilə müqayisədə 6 santimetr azdır. Kür-Bankə məntəqəsində aprelin 14-dən suyun səviyyəsi 18 santimetr azalıb. Hazırda suyun səviyyəsi 79 santimetr olmaqla keçən il ilə müqayisədə 34 santimetr aşağıdır. Araz çayının Novruzlu məntəqəsində isə aprelin 13-dən başlayaraq suyun səviyyəsi 30 santimetr azalıb. Hazırda suyun səviyyəsi 60 santimetr olmaqla keçən il ilə müqayisədə 22 santimetr çoxdur”.
A.Verdiyev qeyd edib ki, hazırda Böyük Qafqazın Balakən-Şəki bölgəsi çaylarında sululuq normadan 17 faiz çox, Oğuz-Qəbələ bölgəsi çaylarında normadan 25, Quba-Xaçmaz bölgəsi çaylarında normadan 7, Kiçik Qafqazın çaylarında isə normadan 53 faiz azdır. Yaxın günlər ərzində gözlənilən yağıntılarla əlaqədar çaylarda sululuğun artacağı proqnozlaşdırılır.
Bölmənin digər xəbərləri
