Hazırda 22 dövlət qurumunda 4Sİ texnologiyaları ilə bağlı 43 müxtəlif layihə icra olunur
Bakı, 13 may, AZƏRTAC
Hazırda 22 dövlət qurumunda 4Sİ texnologiyaları ilə bağlı 43 müxtəlif layihə icra olunur.
AZƏRTAC xəbər verir ki, bu barədə Dördüncü Sənaye İnqilabı (4Sİ) texnologiyaları üzrə İşçi Qrupun 4-cü iclasında bildirilib.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) təşkil etdiyi iclasda aidiyyəti dövlət qurumlarının nümayəndələri iştirak ediblər.
4SİM-in icraçı direktoru Fariz Cəfərov dördüncü sənaye inqilabı sahəsində qurum tərəfindən ölkədə həyata keçirilən layihələr (4SİM çatbotu, Güləşdə süni intellektin tətbiqi, “Coursera” ilə həyata keçirilən “4Sİ Akademiyası”) və Dünya İqtisadi Forumu ilə əməkdaşlıq barədə işçi qrupun üzvlərinə məlumat verib.
Təhlil və monitorinq şöbəsinin müdiri Əzizə Vidadi Rəqəmsal İqtisadiyyatın İnkişafı üzrə Strategiya və həmin strategiya çərçivəsində həyata keçirilməsi planlaşdırılan 9 aparıcı layihə haqqında təqdimatla çıxış edib. Bildirilib ki, strategiyanın 3 əsas istiqaməti var: müəssisələrin rəqəmsal transformasiyası hesabına ÜDM-in artımının sürətləndirilməsi, rəqəmsal cəmiyyətə keçidi təmin etmək üçün vətəndaşların sahəvi bilik və bacarıqlara əlçatanlığının artırılması, dövlət əməliyyatlarının səmərəliliyinin artırılması üçün data əsaslı idarəetmə.
Süni intellekt layihələri üzrə rəhbər Ruslan Zeynalzadə isə 4SİM tərəfindən yaradılmış 4-cü sənaye inqilabı texnologiyalarının reyestri və milli iqtisadiyyatda 4Sİ texnologiyalarının tətbiqinə dair uğurlu həllər barədə məlumat verib. Qeyd olunub ki, hazırda 22 dövlət qurumunda 4Sİ texnologiyaları ilə bağlı 43 müxtəlif layihə icra olunur.
Tədbir daha sonra dövlət qurumlarının nümayəndələrinin iştirakı ilə müzakirə formasında davam edib, onların rəy və təklifləri dinlənilib.
Qeyd edək ki, 4Sİ texnologiyaları üzrə İşçi Qrupu bu texnologiyaların tətbiqi imkanlarının araşdırılması, normativ-hüquqi bazanın, yol xəritələrinin formalaşdırılması, layihələrin əlaqələndirilməsi, həmçinin bu sahədə fəaliyyət göstərən beynəlxalq təşkilatlarla əməkdaşlığı genişləndirmək məqsədilə yaradılıb.
Bölmənin digər xəbərləri
