Səidə xanım İmanova məhz belə həkimlərdəndir. O, respublikamızda geniş şöhrətə malik nevropatoloq, tələbələrin sevdiyi və hörmət bəslədiyi müəllim, alim, ümumiyyətlə, cazibədar insan və gözəl qadındır. Səidə xanım elə həkimlərdəndir ki, belələri ilə adi bir ünsiyyət xəstə üçün sanki məlhəmdir. Deyirlər ki, xəstə bu həkimi görəndə onda ümid baş qaldırır, tezliklə sağalıb ayağa qalxacağına inam yaranır. Həqiqətən, onun nur saçan gözlərində sonsuz xeyirxahlıq, sözlərində və işində özünə böyük ümid var. Bəlkə də buna görədir ki, çoxları Səidə xanımı zarafatla hətta ən narahat xəstələrə belə sakitləşdirici təsir göstərən “cövhər” adlandırır və hesab edirlər ki, seçdiyi nevropatoloq ixtisası məhz onun xeyirxah təbiətinə və daxili təmkininə uyğun gələn bir ixtisasdır. Görünür, Səidə xanımın bir çox konsiliumların daimi iştirakçısı, bir sıra müaıicə klinikalarının məsləhətçisi, elmi işlərin rəyçisi olması da bütün bunlarla və onun dərin nəzəri biliyi və çox zəngin əməli təcrübəsi ilə izah edilir.

Səidə xanımın həkim həmkarları bütün bunlar barəsində onun Azərbaycan Tibb Universitetinin nevrologiya və tibbi genetika kafedrasının dosenti, Beynəlxalq Ekoenergetika Akademiyasıknın professoru seçilməsi münasibətilə təntənəli yığıncaqda, sonra isə lap bu yaxınlarda əlamətdar yubileyində danışdılar. Yeri gəlmişkən, onların bir çoxu vaxtilə Səidə İmanovanın onun tələbəsi olmuş, indi isə kamil mütəxəssis, dosent, professor, ölkəmizin iri səhiyyə münəssisələrinin rəhbərləridir. Zənnimizcə, bütün bunların sirri ondadır ki, Qadın Problemləri üzrə Dövlət Komitəsinin sədri Zəhra Quliyevanın yubiley tədbirində dediyi kimi, “Səidə xanımı tanıyandan sonra onu sevməmək mümkün deyildir”.

Səidə İmanova görkəmli mütəxəssis, peşəkar kimi tanınanadək uzun və çətin bir yol keçmişdir. Hər şeyə öz zəhməti, əzmkarlığı sayəsində nail olmuşdur. Çünki atası o ağrılı-acılı, səksəkəli illərdə repressiyaya məruz qalmışdı. Anası isə... Səidə xanım onun haqqında danışanda kövrəlir. Axı, bu xeyirxah insan qızına insanlara məhəbbət, onların dərdinə şərik olmaq kimi gözəl hisslər, bir də... qətiyyətli olmaq keyfiyyətli aşılamışdır.

Məhz özünün qətiyyəti sayəsində Səidə məktəbi qızıl medalla \ özü də elə bir vəziyyətdə!\ bitirərək, Tibb İnstitutuna daxil olmuş və 1950-ci ildə oranı da fərqlənmə diplomu ilə qurtarmışdır. Sonra Semaşko adına xəstəxanası \indiki Birinci şəhər klinik xəstəxanası\ əsəb xəstəlikləri şöbəsində təcrübə keçmiş, tezliklə isə ordinator həkim olmuşdur. Səidə xanım ilk müəllimini - professor Ağazəki Feyzullayevi minnətdarlıq hissi ilə xatırlayır. Səidə İmanova əsəb sisteminin irsi xəstəlikləri problemlərinə həsr olunmuş ilk elmi işini onunla birlikdə hazırlamış və çap etdirmişdir.

Sonra isə Moskva, SSRİ Tibb Elmləri Akademiyasının Nevrologiya İnstitutu. O, iş yerində bir neçə ay çalışaraq, müsabiqə ilə klinik ordinaturaya keçdi, bundan sonra isə Bakıda aspiranturaya daxil oldu və yenidən Moskva Nevrologiya İnstituna ezam edildi. 1968-ci ildə “Beyində qan dövranının pozulması zamanı damar tonusunun assimmetriyası və arterial təzyiq” mövzusunda namizədlik dissertasiyası müdafiə etdi.

Səidə xanım deyir:

- Mən Moskva Nevrologiya İnstitutuna, xüsusən onun rəhbərlərinə - akademiklər N.Konovalova və Y.Şmidtə, birinci növbədə isə elmi rəhbərim professor Roman Aleksandroviç Tkaçyova çox minnətdaram. Ən əvvəl ona görə ki, o, öz şagirdlərinin hər birində həkim mədəniyyəti, yüksək insani keyfiyyətlər görmək istəyirdi. Yadımdadır, bizə nəsihət verərək deyirdi: Həkim hətta ümidsiz və çarəsiz bir halla üzləşdikdə belə, “yox” sözünü elə deməyi bacarmalıdır ki, bu “bəli” kimi səslənsin. Mən bu məsləhətə öz fəaliyyətimdə həmişə əməl etməyə çalışıram.

Onunla birlikdə işləyənlər də deyirlər ki, Səidə xanım bunu bacarır.

Respublikanın əməkdar müəllimi olan Səidə xanım bu keyfiyyəti tələbələrinə, gələcək həkimlərə öyrətməyə çalışır.

Doktor İmanova bir sıra illər ərzində respublikamızın ən yaxşı nevropatoloqlarının - professorlar Zəhra Salayevanın, Surxay Axundovun, Törə Qədirovanın rəhbərliyi altında işləmişdir. Hazırda isə fəaliyyətini kafedraya uğurla rəhbərlik edən Şərif Mağalovla birlikdə davam etdirir.

90-dan çox elmi əsərin müəllifi olan Səidə İmanova bu gün də elmi axtarışlarını dayandırmır. Özünün bütün, hətta ən kiçik tapıntılarını da yeganə bir arzu ilə - insanların istirablarını yüngünləşdirmək, onları ən ağır azar-bezardan qurtarmaq üçün əməli işdə tətbiq edir.

Səidə xanım İmanova həkimlik peşəsini qəlbinin hökmü ilə seçmişdir, necə deyərlər, bu, ona Tanrının vergisidir. Beləcə də artıq yarım əsrdən çoxdur ki, insanlara şəfa verməklə məşğuldur.

Elmira Əliyeva

AZƏRTAC-ın müxbiri