HƏMAS və İsrail bu gün günorta saatlarında atəşkəs sazişini imzalayacaqlar
Bakı, 9 oktyabr, AZƏRTAC
Fələstin HƏMAS hərəkatı ilə İsrail arasında ABŞ Prezidenti Donald Trampın təşəbbüsü ilə hazırlanmış sülh planının birinci mərhələsinin həyata keçirilməsi üzrə sazişin oktyabrın 9-da günorta saatlarında imzalanacağı gözlənilir.
AZƏRTAC xəbər verir ki, Reuters agentliyi bu barədə mənbələrinə istinadla məlumat yayıb. Məlumata görə, sazişin imzalanmasından dərhal sonra Qəzza sektorunda atəşkəs rejimi qüvvəyə minəcək, 24 saat sonra isə İsrail ordusu bölgədən qismən çıxmağa başlayacaq.
Agentliyin HƏMAS hərəkatındakı mənbəyinin sözlərinə görə, saziş İsrail hökuməti tərəfindən təsdiqləndikdən 72 saat sonra, yəni oktyabrın 11-dək sağ qalan girovlar azad ediləcək. Lakin həlak olmuş 28 nəfərin cəsədlərinin dağıntılar altından çıxarılması üçün əlavə vaxt lazım gələcək.
Qeyd edək ki, oktyabrın 9-da ABŞ Prezidenti Donald Tramp Misirdə aparılan danışıqlar nəticəsində tərəflərin sülh planının birinci mərhələsi üzrə razılığa gəldiyini elan edib. Bu mərhələdə bütün girovların yaxın zamanda azad olunması və İsrail ordusunun Qəzza daxilində razılaşdırılmış xəttə qədər geri çəkilməsi nəzərdə tutulur.
Bölmənin digər xəbərləri
