Hərbi ekspert: Xüsusi Təyinatlı Qüvvələrimiz Vətən müharibəsində Qələbənin qazanılmasında mühüm rol oynadı
Bakı, 30 aprel, AZƏRTAC
İyirmi üç il əvvəl yaradılan Xüsusi Təyinatlı Qüvvələrimiz (XTQ) 44 günlük Vətən müharibəsində Azərbaycanın Qələbəsi qazanmasında mühüm rol oynadı. Demək olar ki, müharibədə həyata keçirdiyimiz bütün genişmiqyaslı və vacib döyüş əməliyyatlarında, o cümlədən Cəbrayıl, Füzuli, Hadrut və Şuşanın işğaldan azad edilməsində, bundan başqa, Qubadlı və Laçının bir çox yaşayış məntəqələrinin azad edilməsində xüsusi təyinatlılarımız misilsiz igidlik göstərdilər.
Bu fikirləri hərbi ekspert Ədalət Verdiyev AZƏRTAC-a açıqlamasında ifadə edib.
O bildirib ki, 2012-ci ildən Aprel döyüşlərinədək xüsusi təyinatlılarımız bir çox məxfi əməliyyatlar həyata keçiriblər. Bu məsələlər mətbuatda çox da geniş işıqlandırılmayıb. Lakin 2016-cı ildə artıq xüsusi təyinatlılarımız Ermənistan ordusuna öz imkan və potensiallarını ciddi şəkildə göstərib. Bundan sonra artıq dünyada xüsusi təyinatlılarımızın imkanları barədə kifayət qədər ciddi məlumatlar yayılmağa başlayıb. Aprel döyüşlərindən sonra xüsusi təyinatlılarımızın strukturunda müəyyən dəyişikliklər edilib, əməliyyat briqadalarına əlavə olaraq, xüsusi təyinatlı briqadaların da yaradılmasına başlanıb. Aprel döyüşlərində və Vətən müharibəsində zəngin döyüş təcrübəsi qazanan xüsusi təyinatlılarımız hazırda davamlı olaraq ştat struktur dəyişikliklərinə keçid almaqla imkan və potensialını hər keçən gün daha da artırır.
“Müharibədə xüsusi təyinatlılarımızın rolu barədə çox danışmışıq. Amma ötən ilin noyabrında Qaragöl istiqamətində ordumuzun uğurları da məhz XTQ-nin sayəsində mümkün oldu. Xüsusi təyinatlılarımız İkinci Qarabağ müharibəsinin ən əhəmiyyətli qələbələrinə imza atdılar. Ən ülvi arzularımızı məhz XTQ reallaşdırdı. XTQ cəbhədəki əməliyyatları, manevrləri ilə üzərinə düşən bütün döyüş tapşırıqlarını ən yüksək səviyyədə yerinə yetirdi və qəhrəmanlıqları ilə əsl igid döyüşçü obrazını qəlbimizə və tariximizə əbədi olaraq həkk etdi. Odur ki, xüsusi təyinatlarımız bizim döyünən ürəyimiz, vuran qolumuz, görən gözümüzdür. Hazırda xüsusi təyinatlılarımız işğalçı Ermənistan ordusunun ən qorxulu kabusudur”, - deyə hərbi ekspert qeyd edib.
Ə.Verdiyev vurğulayıb ki, xüsusi təyinatlılarımızın həyata keçirdikləri əməliyyatlar, xüsusilə də Şuşa və Hadrut əməliyyatları inkişaf etmiş Avropa, NATO, Qərb ölkələrində dərindən araşdırılır, ağır texnika və artilleriya ilə qorunan və qala üzərində, dağ yüksəkliyində yerləşən şəhərin yüngül silahlı bölmələrimiz tərəfindən azad edilməsinin sirlərini öyrənməyə çalışırlar. Bunu araşdıranlar isə unutmamalıdırlar ki, bizim ən güclü, ən dəhşətli silahımiz məhz xüsusi təyinatlı qüvvələrimizin şəxsi heyətidir. Fərqli döyüş və mənəviyyat fəlsəfəsinə malik xüsusi təyinatlı qüvvələrimiz ərazi bütövlüyümüzün təmin edilməsində müstəsna rol oynamaqla yanaşı, xalqımızın və onun dostlarının qəlbində özünə əbədi və möhtəşəm abidə qurub. Bu abidə daim Vətən sərhədlərində sipərdir. Bu abidə düşmənə kabus, dostlara güvəncdir. Bu abidə beynəlxalq və regional təhlükəsizliyə ən böyük töhfədir.
“Müharibədə XTQ-nin zabit, gizir, əsgər və çavuşları da Vətən uğrunda son damla qanlarına qədər döyüşərək şəhidlik zirvəsinə ucaldılar. Onların hər birinin xatirəsi ən yüksək ehtiramla anılır. Xüsusi Təyinatlı Qüvvələrimizin də sayəsində bu gün Azərbaycan qalib ölkədir. Biz isə qalib ölkənin qalib vətəndaşlarıyıq. İnanıram ki, Azərbaycanın Xüsusi Təyinatlı Qüvvələri mövcud olduğu müddətdə regionda ağlı başında olan kimsə ölkəmizin maraqlarına zidd hərəkət etmək niyyətinə düşməyəcək. Onlarla fəxr edirik”, - deyə hərbi ekspert vurğulayıb.
Bölmənin digər xəbərləri
