“Tural-Ə” Nəşriyyat-Poliqrafiya Mərkəzi “Heydər Əliyev və Şərq” silsiləsindən ilk kitabı nəfis şəkildə çapdan buraxmışdır. Nəşrin təşəbbüsçüsü və kitaba ön sözün müəllifi xarici işlər naziri, professor Vilayət Quliyev, müəllif-tərtibçilər Xarici İşlər Nazirliyinin müşavirləri, filologiya elimləri doktoru Qaley Allahverdiyev və Vəhdət Sultanzadə, məsləhətçi-rəyçi Prezidentin İcra Aparatının şöbə müdiri, səfir Novruz Məmmədov, redaktoru Milli Məclisin deputatı, tarix elmləri namizədi Mübariz Qurbanlıdır. Kitabın hazırlanmasında AZƏRTAC-ın materiallarından istifadə olunmuşdur. 

Kitab dövlətimizin başçısının rəngli fotoşəkli və bu dialoqla başlayır:

“X.Rza: Yönümüz harayadır, Heydər bəy?

H.Əliyev: Yönümüz Şərqə olsa da, yolumuz Qərbədir.

X. Rza: Günəş Qərbdə batır...

H. Əliyev: Qərbdə batır ki, Şərqdən doğsun ...”

Xarici işlər naziri V.Quliyev “Şərqlə Qərbi birləşdirən siyasətçi” sərlövhəli və Azərbaycan, türk, ərəb, fars, ingilis və rus dillərində dərc olunmuş ön sözə Özbəkistan Respublikasının Prezidenti İslam Kərimovun “Rəhbəri Heydər Əliyev olan xalq xoşbəxtdir” kəlamını epiqraf seçmişdir.

Ön sözdə deyildiyi kimi, XX əsrin axırlarında Azərbaycan yenidən dövlət müstəqilliyinə qovuşduqdan sonra ölkəmizin qarşısında milli maraqlara maksimum cavab verən çoxşaxəli xarici siyasət doktrinası formalaşdırmaq vəzifəsi dururdu. Şübhəsiz ki, bu doktrinada Şərqin Azərbaycanla bu və ya başqa dərəcədə tarixi bağlılığı, etnik, dini, mədəni ümumilyi olan ölkələri ilə əlaqələrə xüsusi yer verilməsi zəruri idi. Gənc müstəqil dövlətin gələcək taleyi üçün çox mühüm olan bu missiyanın da əsas ağırlığı Prezident Heydər Əliyevin üzərinə düşmüşdür. Onun rəhbərliyi və birbaşa iştirakı ilə Azərbaycan Respublikası həm özünün qərbyönlü siyasət doktrinasını yaratmış, həm də Şərq ölkələri, ilk növbədə müsəlman Şərqi ilə də sıx münasibətlər qurmuşdur.

Kitabın müəllifləri peşəkar diplomatlardır və uzun müddət Şərq ölkələrində işləmiş, müstəqil Azərbaycan dövlətinin bu regionda siyasətinin həyata keçirilməsində iştirak etmişlər. Onlar bu sahədəki təcrübələrinə və mövzuya bələd olmalarına əsaslanaraq, Azərbaycan Prezidenti Heydər Əliyevin rəhbərliyi ilə respublikamızın Şərq ölkələrinə münasibətdə xarici siyasətinin başlıca cəhətlərini araşdırmış, bu istiqamətdəki uğurları ümumiləşdirməyə təşəbbüs göstərmişlər. Kitabda verilmiş materiallar dövlətimizin xarici siyasətinin mühüm bir istiqaməti barədə təsəvvür yaratmaqla yanaşı, həm də Yaxın və Orta Şərq ölkələrinə münasibətdə düzgün seçilmiş, hərtərəfli götür-qoy edilmiş, dövlətin və xalqın milli maraqlarına cavab verən siyasətin Azərbaycan kimi gənc müstəqil respublika üçün nə qədər vacib olduğunu bir daha təsdiqləyir.

Bu istiqamətdə işlərini davam etdirən müəlliflərə uğurlar arzulayırıq.