HEYDƏR ƏLİYEVİN SİMASINDA GÜRCÜSTAN BÖYÜK DOSTUNU İTİRMİŞDİR
AZƏRTAC-ın müxbiri Tbilisidən xəbər verir ki, Gürcüstan parlamenti sədrinin müavini Vaxtanq Rçeulişvili demişdir: Heydər Əliyevin simasında Gürcüstan böyük dostunu itirmişdir. Heydər Əliyev Azərbaycanın inkişafında olduqca böyük rol oynamış görkəmli dövlət xadimi, Böyük İpək yolunun dirçəldilməsinə, əsrin layihələrinin – Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri layihələrinin hazırlanmasına və gerçəkləşdirilməsinə həlledici töhfə vermiş beynəlxalq miqyaslı siyasətçi idi. Azərbaycanın və Gürcüstanın bundan sonrakı bütün rəhbərləri əsası Heydər Əliyev və Eduard Şevardnadze tərəfindən qoyulmuş qarşılıqlı dostluq münasibətlərini inkişaf etdirməli və dərinləşdirməlidirlər.
Gürcüstan parlamenti sədrinin müavini Heydər Əliyevin vəfatı ilə əlaqədar Azərbaycan xalqına başsağlığı vermiş və onun dəfn mərasimində iştirak etmək üçün Bakıya gedəcəyini bildirmişdir.
İlkin məlumata görə, Azərbaycanın sabiq Prezidentinin dəfn mərasimində Gürcüstanın yeni rəhbərliyinin rəsmi nümayəndə heyəti də iştirak edəcəkdir.
Bölmənin digər xəbərləri
